गोंयचेंय राजकारण तापता

भांगरभूंय | प्रतिनिधी

समाज वेपारी, वेवसायिक जाता तेन्ना तें पडबिंब लोकशायेच्या चार खांब्यांचेर पडटा. लोकशायेचो मुखेल खांबो जेन्ना तापता तेन्ना दुसरो, तिसरो, चवथो खांबो तापचोना?

उबाळाचे दीस सुरु जाल्यात. जेईई, नीट, हेर परीक्षांचें वजें विद्यार्थ्यांच्या माथ्यार आसा. भुरग्यांची कुशळताय सोदची, विद्यार्थ्यांक शिक्षकांचे बरें मार्गदर्शन मेळचें ही मुख्यमंत्री डाॅ. प्रमोद सावंत हांचीं मोलादिक उतरां. विद्यार्थ्यांच्या पालकांकय ह्या उतरांनी जाग येतली. विद्यार्थ्यांक तांचे आवडीचें शिक्षण, परिक्षेचे पर्याय दिवप गरजेचें. पालकांनी भुरग्यां कडेन उलोवचें, आपली आवड भुरग्याचेर थापची न्हय, भावंडां भितर तुळा नाका अशें सांगपी कावन्सेलर जाय. भुरग्यांक मेकळेपण दिल्यार, पयसुल्ल्यान तांचेर नदर दवल्ल्यार, वह्यो, पुस्तकां पळेल्यार पालकांकय भुरगें कितें करता तें कळटा.
धावी, बारावेचो निकाल बेगीन दितना चुको जाल्या आसतल्यो. गोवा बोर्ड तंत्रगिन्यानात फुडें पाविल्ल्यान चुको सुदारपाक कळाव लागचोना. तंत्रिक शिक्षण संचालनालय, गोवा बोर्ड, शिक्षण विकास म्हामंडळांत कावन्सेलिंग विभाग आसपाक जाय. परिक्षेच्या दिसांनी सोशल मिडीया, टिव्हीची खावड विद्यार्थ्यांक मेळटा तेन्ना सत कितें तें पालकांनी समजून दिवचें पडटलें. परिक्षा, क्लायमेट चेंज, बोवाळांत ‘माय’ चड तापतना हातकातरो खांबो, सेंट फ्रान्सिस झेवियराच्या डीएनएचे वाद तिडक हाडपी.
गोंय विधानसभा वेंचणुको लागीं आयिल्ल्यान राजकारण तापूंक लागलां. केरळ, अस्तंत बंगाल, तामीळनाडू, पाँडेचरी, आसाम विधानसभा वेंचणुकांचे रिजल्ट 4 मे क जातले. तेआदींच गोंय विधानसभा वेंचणुकेचें वारें व्हावंक लागलां, फुडल्या सप्तकां, म्हयन्यांनी गोंयचें राजकारण आनीक तापतलें. 18 वर्सां वयलींच न्हय सात आठ वर्सांचीं भुरगींय राजकारणी, आमदार, नगरसेवक, मंत्री आयज वळखतात.
शेनवार, आयताराचे दीस पळोवन वेंचणुको पयलीं जाताल्यो, तातूंत आतां बदल जाल्यात. मतदान यंत्रां आयिल्ल्यान मतदानाचें टायमिंग बदललां. वेंचणुकेआदीं स म्हयने मतदारांचें मन तयार करपापासत मतदारांचे मन समजून घेवप जाता. मतदानाआदीं, उपरांत, मतमेजणे पयलीं येवपी एक्झिट पोल्स, पोल आॅफ पोल्स दिसभर टिव्हीर दाखयतात.
प्री पोल सर्व्हे दिसभर, दिसांनदीस गांवगिऱ्या वाठारांनी मोबायलारय पाविल्ल्यान राजकारणाच्या वाऱ्याची दिका बदलता व्हय? पांच राज्यांच्या वेंचणुकेचे रिजल्ट एक्झिट पोला प्रमाण शंभर टक्के नासत 90 टक्के बराबर आसतात हें मतदारांक कळ्ळां. चार यंत्रणांचे एक सारके एक्झीट पोल आसतात तेन्ना वेंचणूक कोण जिखता, जिखना तें कळटा.
वेंचणूक रिजल्टाआदीं राजकारणाची घरां शिंवपा पासत बसका सुरु जाल्यात. बसकेंत जें जातां ती म्हायती मेळोवप एक आव्हान आसता. म्हणयारे, मुखेल फुडारी 80 टक्के सत लिपोवन दवरतात, 20 टक्के म्हायती दिवन खबरांतल्यान वातावरण तयार करतात. एका उतरा वयल्यान मध्यरातीं खबर दितना चुकोय जातात. राजकारणातल्यो त्यो चुको फुडारांत सुदारतात, पूण इतिहास, पुस्तकांतले म्हायतीचेर संशोधन जावंक शकता? देखीक हातकातऱ्या खांब्याचो इतिहास. आसात व्हय तिनशे चारशें वर्सांचे सेंट फ्रान्सिस झेवियर गोंयांत आयिल्लो तेन्ना ताणे कितें केल्लें तें पळोवपी?
गोंयांतलो हातकातरो खांबो, धर्मांतरणाचें मेज पुर्तुगेजांच्या तेंपा वयलें. पूल, बिल्डिंगोय आसात. कांय कोसमेवपाच्या मार्गार, कांय नवें रुप घेतिल्ल्यो. पुरातत्व खात्यान जतनाय घेतिल्ल्यो वस्ती पळोवपी, इतिहासाचीं पुस्तकां वाचपी कितले आसात? सांगिल्लें आयकून उलोवपांतल्यान केल्लो बोवाळ विद्यार्थ्यांक उबाळाच्या दिसांनी त्रास दिता.
पुर्तुगिजांच्या तेंपा वयल्यो कुरवो गोंयांत आसात, तांचो इतिहास पांचशे वर्सांआदींचो. शंभर वर्साआदीं भारतकार हेगडे देसाय हांच्या अग्रलेखांतल्यान तो मांडला. अग्रलेख बारीकसाणेन वाचल्यार तांकां तो कोणे सांगलो, तांणी कोणा कडल्यान आयकल्लो ती म्हायती ना. भारतकारांच्या अग्रलेखांचेर विश्वास दवरपी एक पिळगी, समाज आयजय आसा जाल्यार दुसरी पिळगी, समाज सेंट फ्रान्सिस झेवियराच्या वावराची म्हायती दिवपी. विकीपिडीया सेंट फ्रान्सिस झेवियरांक संतपद मेळपाआदीं भारत, गोंयांन तेंको दिल्लो अशी म्हायती दिता. तो तेंप ब्रिटीश, पुर्तुगीज राजवटीचो. विकीपिडीया सेंट फ्रान्सिस झेवियर धर्मांतरण, धर्म प्रचारक म्हणून गोंयांत आयिल्ले अशें सांगता? ती सत, फट सांगपी, अणभव आशिल्ले आमचे मदीं नात.
हातकातरो खांबो पळोवचो दिसल्यार उबाळाच्या दिसांनी तिनसांजे वच्चें. इतिहासाच्या पुस्तकांत फोटोय आसतले ते पळोवचे, वाचन करचें. जें वाचतात, पळेतात तें समजूनय घेवचें. कोणेय सांगलें, बरोवन दिलें जाल्यार उलोवप, ताचेर भासाभास करप समा न्हय. निमणे तो इतिहास. भासाभासे पयलीं अचूक (फॅक्ट) म्हायती मेळोवप बरें. नाजाल्यार निमणे विरोध करपी कोर्टाचीं सोंपणा चडून शिक्षाय भोगची पडटा. शिक्षक, पालक, राजकारण्यांनी हें भुरग्यांक सांगपाची गरज उपरासल्या. इतिहासाचेर राजकारण तापोवप, समाजीक, लोकजिणेचे विशय पयस दवरप राज्याक लाव दिवपी न्हय.
गोंय विधानसभा वेंचणुको लागीं आसात, त्यो बेगीन जावपाची शक्यताय आसा. एकादरो म्हयनो त्यो पयलीं, स म्हयन्या आदींय जायत. भारतीय वेंचणूक आयोगाचे अधिकारी राज्यांत येवन अधिकारी, सगल्या राजकी पक्षांच्या मुखेल्यां कडेन भासाभास करुन वेंचणूक केन्ना जावप तें थारायता. ताचे आदीं तीन ते चार म्हयने पयलीं बदल्यो, निमणी मतदारयादी, निमणे विधानसभा अधिवेशन जातलें. ‘इनफ इज इनफ’ चळवळींतल्यान केंद्र सरकारान दिल्ले निर्देश पाळपाचो वावर सुरु जाला. सरकाराकय धा पंधरा वर्सांआदीं जाल्ल्यो चुको सुदारपाक जाय तें कळ्ळां हें म्हत्वाचें. सरकार चुको केन्ना करता? समाज वगी रावता, चुकता तेन्ना. समाज वेपारी, वेवसायिक जाता तेन्ना तें पडबिंब लोकशायेच्या चार खांब्यांचेर पडटा. लोकशायेचो मुखेल खांबो जेन्ना तापता तेन्ना दुसरो, तिसरो, चवथो खांबो तापचोना?
तिसरें संवसारीक झुज राश्ट्रां राश्ट्रां मदीं आशिल्ल्या राखणेशस्त्रांची परिक्षा घेवपा पासत जातलें? झुजाचे परिणाम खर आसतले ताची जाणवीकाय संवसारांतल्या सगल्या राश्ट्रांच्या मुखेल्यांक जाल्या. झुज पालोवपा पासत येत्न सुरु जाल्यात, वेगळोचाराची भास राश्ट्रां करपाक लागल्यांत. हेर राश्ट्रांनी वेंचणुको लागीं आयल्यात, भारतावरी त्या राश्ट्रांकय थळांतराचे जांच जातात. तातूंतल्यान झुजाची, शांतीकायेची, म्हारगायेची भास सुरु जाता तेन्ना भुरग्यांचो विचार करप म्हत्वाचें. भुरगीं फुडाराची शक्ती, तांकां सत समजलेंना, वगतार कळीत केलेंना जाल्यार तांची वाट चुकता.
ज्येश्ठत्व येतना तिडक येता, ओंठातल्यान चुकीची उतरां लोकां मुखार वतात, घुस्पागोंदळ वाडटा, झुजाक बळगें मेळटा. ज्येश्ठ राजकारण्यांनी आपली पिराय, अॅण्टी इनकम्बन्सीचीं ( प्रस्थापिता विरुद्ध) तासां वळखुपाक जाय असो रकाद हालींच्यो वेंचणुको दितल्यो व्हय?

सुहासिनी प्रभुगांवकार
9881099260