भांगरभूंय | प्रतिनिधी
मारियो द मिरांडा हे गोंयचे एक लोकप्रीय अशे संस्कृतीक मानचिन्न (आयकॉन) जावन आसात. तांच्या जिव्या आनी विनोदी रेखाचित्रांनी गोंयच्या सामान्य जिविताचो आनी वाठाराचो आत्मो ओड लायता तसो चितारला. आपले खाशेले शैलींतल्यान ताणीं गोंयचे गर्दी आशिल्ले रस्ते, गांवांतलीं दृश्यां आनी समाजीक घडणुको हांचेर उपरोधिक, पूण आपुलकायेन उजवाड घालो. तांचें काम भास आनी भूगोल हांचे पलतडीं पावलें, तें नामनेच्या प्रकाशनांनी उजवाडाक आयलें आनी तांकां राष्ट्रीय, आंतरराष्ट्रीय पांवड्याचेर वळख मेळोवन दिली. मारियो हांकां टपाल तिकीट शास्त्र (फिलेटेली) माध्यमांतल्यान दिल्ली श्रद्धांजली ही फकत त्या कलाकाराचोच न्हय, तर गोंयच्या जिवंत संस्कृतीचोय सन्मान थारता.
अश्या महान व्यक्तीचो भोवमान करपा खातीर टपाल तिकीट हें एक आगळें-वेगळें आनी कायमस्वरूपी माध्यम आसा. मारियो हांचीं चित्रां आशिल्लीं तिकिटां, खास पाकिटां (कव्हर्स) आनी शिक्के हीं ल्हान चित्रां भशेन जगाच्या खाची कोनशांनी भोंवतात आनी तांचे कलेची वळख जगाक करून दितात. ह्यो वस्तू इतिहास, कला आनी अस्मिताय सांबाळून दवरतात. प्रदर्शनां वरवीं आमी तांच्या कलेचो प्रवास आनी तांच्या चित्रांनी कशे बदलत वचपी काळ काळजांत सांबाळ्ळा हें पळोवं शकतात.
ह्या विशयाचेर पणजेच्या फिलेटेलीक ब्युरोंत (मुखेल पोस्ट आॅफिसा मुखार) 5 मे सावन भरयिल्लें टपाल तिकीट प्रदर्शन हें फकत एक प्रदर्शन उरना, तर ती एक संस्कृतीक काणी जाता. तें पळोवप्यांक मारियोच्या दोळ्यांतल्यान गोंय पळोवपाची, तांच्या रेखाचित्रांतलो विनोद आनी माणुसकी अणभवपाची आनी भारतीय कलेतल्या तांच्या योगदानाची वळख करून दिता. अशी श्रद्धांजली तांच्या जल्म शताब्दी दिसा तांचो सन्मान तर करताच, पूण येवपी पिळगेक सर्जनशीलता आनी काणी सांगपाचे कलेची प्रेरणा दिता.
– डॉ. एम. आर. रमेश कुमार
94230 56323
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
