भांगरभूंय | प्रतिनिधी
चवकशी करून दोशींचेर कारवाय जातली : मुख्यमंत्री
सरकाराचो कारभार नितळ
कागाळी फाटल्यान बदनामी करपाचो हेत
पणजी : हॉटेल तशेंच क्लबां कडल्यान खंडणी वसूल जाता हें प्रधानमंत्र्यांक बरयिल्लें पत्र बोगस आशिल्ल्याचें पुलिसांच्या गुन्यांव फांट्यान स्पश्ट केलां. हें पत्र व्हायरल जाल्ल्या कारणान बरीच खवदळ पडिल्ली. मुळावो तपासा केले उपरांत पत्र बोगस आशिल्ल्याचें गुन्यांव फांट्यान सांगलें.
हें बनावट पत्र व्हिएतनामच्यान तयार जालां. हाचे फाटल्यान सायबर गुन्यांवकार आसा, अशें गुन्यांव फांट्यान म्हणलां.
दोन दिसां पयलीं हॉटेलवाल्यां कडल्यान मुख्यमंत्री गुंडां वरवीं खंडणी एकठांय करतात अशें पत्र व्हायरल जाल्लें. क्लब आनी रॅस्टोरंण्ट धनयांनी प्रधानमंत्री नरेंद्र मोदी आनी केंद्रीय गृह मंत्री अमीत शाह हांकां हें पत्र बरयलां. ह्या पत्राचेर सात क्लब धनयांच्यो सयो आसात. हें पत्र खरें काय बनावट ताची खातरजमा अजून जावंक ना. सयो केल्ल्या दोगां जाणांनी आपल्या नांवान बनावट सयो केल्ल्याची कागाळ पुलिशेंत केल्या. हाका लागून ह्या पत्रा विशीं दुबाव निर्माण जाला.
राज्यांतल्या कायदो सुवेवस्थेंत इबाड जाला. हणजूणच्या रिसॉर्टांत हालींच पर्यटकाक मारपेट जाली. हाका लागून गोंयची बदनामी जाल्या. आमदार मायकल लोबो हांणी लेगीत हॉटेल तशेंच रॅस्टोरंण्टकारां कडेन कांय जाण खंडणी मागतात हाका दुजारो दिला. हे फाटभुंयेर हें पत्र व्हायरल जालां. ह्या पत्राक लागून राज्यांत खवदळ पडला.
पत्राची मुख्यमंत्र्यांनी घेतली दखल
हें पत्र खरें आसा काय बोगस ताची चवकशी जातली. पत्राचेर जांच्यो सयो आसात तांची चवकशी जातली. पत्रा सकयल्यो सयो बनावट आसपाची शक्यताय आसा. सयांची तशेंच पत्राची चवकशी जातली. जांणी हें पत्र बरोवन व्हायरल केलां, ते दोशी आसात. दोशींचेर चवकशी उपरांत कारवाय जातली. पुलीस म्हासंचालकांक चवकशीचे आदेश दिल्यात अशें मुख्यमंत्र्यांनी सांगलें.
पत्रा फाटल्यान बदनामीचें षडयंत्र
म्हजें सरकार बरो वावर करता. सगल्या वाठारांनी उदरगत सुरू आसा. सरकार तशेंच म्हजी बदनामी करपाचें षडयंत्र ह्या पत्रा फाटल्यान आसा. सरकाराची बदनामी करून कांय जाण राजकी लाव घेवपाक सोदतात अशें मुख्यमंत्री डॉ. प्रमोद सावंत हांणी सांगलें.
प्रधानमंत्री नरेंद्र मोदी तशेंच केंद्रीय गृह मंत्री अमीत शाह हांकां हें पत्र बरयलां. हें पत्र प्रधानमंत्री तशेंच गृह मंत्र्यांचे कचेरेंत पावलां? हाची चवकशी जातली. हें पत्र प्रधानमंत्र्यांचे कचेरेंत पावलां काय ना तें आपणाक खबर ना अशें मुख्यमंत्र्यांनी सांगलें.
पुराय प्रकरणाक लागून हॉटेल तशेंच क्लब धनयांची अडचण वाडल्या. कोविडा उपरांत स्थिती सामान्य जाली आनी पर्यटकांचो आंकडो वाडपाक लागलो. गैरप्रकारांक आळाबंद घालपा खातीर सरकारान हॉटेलांचीं नोंदणी सक्तीची केली. हॉटेलांच्या नोंदणीचो आंकडो वाडत आसा. तशेंच खंडपिठाच्या निर्णयाक लागून रातचो लावडस्पिकर आनी संगिताच्याे कार्यावळी बंद केल्यो. हाका लागून हॉटेलकारांक फटको बसला. हें जातकूच हणजूण्यां कर्मचाऱ्या कडल्यान पर्यटकाक मारपेट जाली. पर्यटकांनी कायदो हातांत घेवचो न्हय, अशें आवाहन मुख्यमंत्र्यांनी पुलिसांची बसका घेवन केलें. आतां खंडणीचें पत्र व्हायरल जाल्ल्यान प्रकरणाक मोडण मेळ्ळां.
सरकाराक बदनाम करून राजकी लाव घेवपाचें षडयंत्र पत्रा फाटल्यान आसा. चवकशी जावन कारवाय जातली.
मुख्यमंत्री, डॉ. प्रमोद सावंत
सयो खऱ्यो काय बनावट हाचो तपास
व्हायरल जाल्ल्या पत्राचेर सात जाणांच्यो सयो आसात. हातूंत साहील अडवलपालकार आनी नंदन कुडचडकार हांणी आपल्या नांवाची बनावट सय केल्ल्याची पुलिशेंत कागाळ केल्या. हाका लागून प्रकरणाचो तपास करतना पयली सयांचो तपास करचो पडटलो. हेर पांच जाणांच्यो सयो खऱ्यो काय बनावट हांचोय तपास करचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
