भांगरभूंय | प्रतिनिधी
उत्तर कोरियेचो हुकूमशाह किम जोंग उन आपल्या विक्षीप्तपणाक लागून संवसारीक नामनेक पावला. ताच्या विक्षिप्तपणाच्यो काणयो दिसपट्ट्यो येतात. किम जोंग उन जितलो सणकी तितलोच आक्रमक राष्ट्रमुखेली.
फाटल्या कांय वर्सांत ताणें क्षेपणास्त्राची चांचणी करून अमेरिका, जपान, दक्षीण कोरिये सारक्या आपल्या दुस्मानाक शिटकावणी दिवपाचो यत्न केला. डोनाल्ड ट्रम्प अमेरिकेचे अध्यक्ष आसतना ताणें कांय प्रमाणांत संयमी भुमिका आपणायिल्ली. (कारण दोगूय एकेच माळेचे मणी) पूण, आतां ज्यो बायडन अमेरिकेचे अध्यक्ष जाले उपरांत किम जोंग उन परतून आक्रमक जाला. अमेरिके वांगडा दक्षीण कोरियेन केल्ल्या संयुक्त लश्करी कवायतीक लागून ताका राग आयलो आनी ताणें अमेरिका आनी दक्षीण कोरियेक शिटकावणी दिवपाक एकाच वेळार 23 क्षेपणास्त्रां सोडलीं. ताचे आक्रमक भुमिकेक लागून संवसारभर खवदळ जालो. ह्या 23 क्षेपणास्त्रां मदलीं कांय दक्षीण कोरियेचे दर्या शिमे लागीं पडलीं जाल्यार कांय जपानाचे शिमे लागीं. उत्तर कोरियेचे आक्रमकतायेक लागून दक्षीण कोरिया आनी जपानाक हुस्को जाला.
उत्तर कोरियेन उडयल्ल्या ह्या क्षेपणास्त्रांचो बदलो घेवपाक दक्षीण कोरियेन उत्तर कोरियेचे वटेन तीन क्षेपणास्त्रां सोडलीं. सुदैवान तीं उत्तर कोरियेंत पडलीं नात. उत्तर कोरियेच्या हल्ल्या उपरांत जपानाच्या संरक्षण मंत्र्यान रोखडोच थेट प्रतिसाद दिवपाची शिटकावणी दिली. आमी जपानी लोकांची राखण करूंक सोदतात. उत्तर कोरियेन हो हल्लो परतून केलो जाल्यार जपान तसोच प्रतिसाद दितलें अशी शिटकावणीय जपानान उत्तर कोरियेक दिल्या. देखून एके वटेन उत्तर कोरिया आनी दुसरे वटेन दक्षीण कोरिया आनी जपान अशी स्थिती निर्माण जाल्या. पूण, हाका लागून संवसाराचो हुस्को वाडला. कारण किम जोंग उन हो विक्षिप्त मनीस. ताचे कडेन अणवस्त्रांचो सांठो आसा. जर हो वाद सुटावो जालो ना आनी फाल्यां झुज पेटलें जाल्यार हो हुकूमशाह अणुबाॅम्ब वापरपाक फाटीं फुडें पळोवचो ना.
उत्तर कोरियेक आदीं सावन आक्रमक राश्ट्र म्हूण वळखतात. सत्तराच्या दशकांत तांणी रशियेक अणु शक्त निर्माण करपाक मदत कर अशें सांगिल्लें. पूण रशियेन न्हयकार दिलो. दक्षीण कोरिया अमेरिकेक लागीं जातकच रशियेन उत्तर कोरियेक मजत करपाचें थारायलें आनी 1978 ते 1991 ह्या काळांत उत्तर कोरियेक अणुशक्त वाडोवपाक आदार केलो. ह्या काळांत चीनान उत्तर कोरियेचे अण्विक महत्वाकांक्षेकूय सारें- उदक घालें, देखून उत्तर कोरिया आयज अणुशस्त्रां आशिल्लें राश्ट्र जालां. जपान आनी उत्तर कोरियाचे त्रास मात वाडल्यात.
द. कोरिया आनी उत्तर कोरिया हांचे मदीं संघर्श जावप हें नवें न्हय. आतां मेरेन उत्तर कोरियेन द. कोरियेचेर सात फावटीं हल्लो केला, पूण अमेरिका द. कोरिया फाटल्यान घट्ट उबो रावला. जपान सारको शांत देश मात ह्या दोन कोरियांच्या संघर्शांत गरजे भायर आडकला. जपान द. कोरियेचे इश्ट आशिल्ल्यान उत्तर कोरिया ताका दुस्मान मानता, देखून तो जपान, द. कोरियेचेर क्षेपणास्त्रां सोडटा. ही परिस्थिती अशीच उरली जाल्यार जपानूय आपलें सार्वभौमत्व तिगोवन दवरपाक दोनूय कोरियांच्या संघर्शांत उडी घेतलो, पूण मागीर सगलें हाता भायर वतलें. देखूनच संयुक्त राश्ट्रां सयत सगळ्या देशांनी हो संघर्श आनीक वाडचो न्हय म्हूण फुडाकार घेवपाक जाय. खंयच्याच देशाक झुज परवडना. झुजाचो भार सोंसतात ते सामान्य लोकच. किम जोंग उन सारक्या विक्षिप्त हुकूमशाहाक हाचें कांय पडिल्लें नासता. ताकाच लागून तो अशीं आबुजपणां करपाक लागला.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
