भांगरभूंय | प्रतिनिधी
म्हापशें: ग्रण्ड चिवार, हणजूण्यां बांयंत न्हाता आसतना साहील अन्वर ह्या 16 वर्सां पिरायेच्या चल्याक बुडून मरण आयलें. साहील धावेंत शिकतालो. ट्युशना सावन घरा परतून येतना बांयंत पेंवपा खातीर उडी मारली आनी थंयच तो बुडलो.
ही घडणूक बिरेस्तारा सांजवेळा 3.30 ते 4 वरां मजगतीं घडली. शाळा सुटले उपरांत वट्ट चार भुरगीं ट्युशना खातीर गेल्लीं. ट्युशना सावन परतून येतना वाटेर आशिल्ले बांयचेर तो पेंवपा खातीर देंवलो. जाल्यार इश्टांनी ताका आडावपाचो यत्न केलो तरी लेगीत ताणें उदकांत उडी मारली.
साहील बुचकळ्यो घेवंक लागिल्ल्यान ताच्या इश्टांनी ताका भायर काडपा खातीर दोरी उडयली. तो मेरेन तो बुडिल्लो. तेच बरोबर भुरग्यांनी वाड्यार धांव मारली आनी लोकांक घडणुकेची म्हायती दिली. लोक घडणूक थळार पावले उपरांत उजो पालोवपी दळाक आपयलें.
म्हापशें उजो पालोवपी दळाचे अधिकारी श्रीकृष्ण पर्रीकार आनी उपअधिकारी अशोक परब हांच्या फुडारपणा खाला जवानांनी साहीलाची कूड भायर काडली.
हणजूणेंचे पुलीस उपनिरिक्षक धीरज देविदास हांणी पंचनामो केलो आनी कूड मरणा उपरांतचे तपासणे खातीर गोमॅकाँत धाडून दिल्या. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
