भांगरभूंय | प्रतिनिधी
समुपदेशक सुषमा कवठणकार हांचें सांगणें
पणजी: परिक्षेचे पयलीं आनी परिक्षेच्या काळांत वेळाचें योग्य नियोजन करीत जाल्यार खंयच्याय तणावाक सामकार वच्चें पडचें ना. तशेंच परिक्षेंतूय येस मेळटलें अशें आंबिये म्हाविद्यालयांतल्यो समुपदेशक सुषमा कवठणकार हांणी सांगलें.
त्यो कोंकणी विभागा वतीन आयोजीत केल्ल्या परिक्षेचे नदरेंतल्यान तणावाचें वेवस्थापन ह्या विशया वेल्या विशेश व्याख्यानांत उलयताल्यो.
ह्या वेळार माचयेर उपप्राचार्य डॉ. ल्युसी जेम्स, कार्यावळीच्यो मुख्य संयोजिका कोंकणी विभागांतल्यो प्राध्यापिका मानसी धाऊसकार बी मानेस्त हाजीर आशिल्ले.
परिक्षेच्या वेळार शारिरीक आनी मानसीक भलायकीचें स्वास्थ लेगीत तितलेंच म्हत्वाचें आसा. तें वेवस्थीत राखप दरेक विद्यार्थ्यांची जापसालदारकी आसा. हे खातीर विद्यार्थ्यांनी मोबायल आनी सोशल मिडियाचो वापर टाळचो. ताका लागून कसलेच तरेचो तणाव उप्रासचो ना अशें कवठणकार हांणी म्हणलें.
मजगतीं, समुपदेशक कवठणकार हांणी परंपरीक व्याख्यान पद्दतीक छेद दिवन पीपीटी सादरीकरणा सयत विद्यार्थ्यांक सहजतायेन आनी सुलभतायेन विशय समजावन सांगिल्ल्यान विद्यार्थ्यांक ह्या व्याख्यानाचो बरो लाव जालो. तशेंच व्याख्यान सोंपले उपरांत 10 मिणटां ध्यानधरणाचें म्हत्व सांगून ते विद्यार्थी आनी शिक्षकां कडल्यान करून घेतिल्ल्यान ताचो फायदो विद्यार्थी आनी शिक्षकांकूय जालो.
कार्यावळीचें प्रास्तावीक करतना उपप्राचार्य आनी प्रभारी कोंकणी मुखेली डॉ. ल्युसी जेम्स हांणी ह्या विशेश व्याख्यानाचें आयोजन केल्ले खातीर संयोजिका प्रा. मानसी धाऊसकार हांची तोखणाय केली आनी फुडल्या कार्यावळी खातीर शुभेत्सा दिल्यो.
प्रा. मानसी धाऊसकार हांणी मानेस्तांक येवकार दिलो. मुखेल मार्गदर्शक समुपदेशक सुषमा कवठणकार हांची वळख आर्या रावत हांणी करून दिली. सुत्रसंचालन सानिका गांवकार हांणी केलें जाल्यार उपकार नम्रता सामंत हांणी मानले. ह्या वेळार विद्यार्थ्यां सयत म्हाविद्यालयांतले प्राध्यापक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
