भांगरभूंय | प्रतिनिधी
प्रतिश्ठीत महोत्सवांत सुवात मेळिल्ल्यान गोंया खातीर अभिमानाचो खीण
खबरां मेज
पणजीः गोंयांतल्या ‘वाग्रो’ (त्यागाची सुवात) ह्या लघुपटाक अंदूंच्या प्रतिश्ठीत कान्स चित्रपट महोत्सवांत शॉर्ट फिल्म कॉर्नर श्रेणींत अधिकृतपणान सुवात मेळ्ळ्या. कान्स चित्रपट महोत्सवांत जगभरांतल्या जगभरांतल्या उत्कृश्ठ लघुपटांची निवड जाता. अंदूं गोंयच्या ‘वाग्रो’ ह्या लघुपटाक सुवात मेळिल्ल्यान निश्चीतच हो गोंया खातीर अभिमानाचो खीण आसा.
‘वाग्रो’ ही एक जोडप्याची मोगकथा आसा. जी एके परिस्थितींत घुस्पल्ली आसून आपूण खंय आसात आनी कोणा कडेन संबंदींत आसात, हे सोदपांत रंगिल्ली आसा. लघुपटाची कथा, पटकथा आनी दिग्दर्शन साईनाथ उसकयकार हांणी केलां. ते स्वता इंजिनिअर आसात. राजेश पेडणेंकार अानी गायत्री पेडणेंकार हांच्या फुडारपणा खाला दोन खेपे राष्ट्रीय पुरस्कार जैतिवंत डी गोवन स्टुडिओन ह्या लघुपटाची निर्मणी केल्या.
लघुपटाचे ध्वनीमुद्रण आनी मिक्सींग चार खेपे राष्ट्रीय डिझायनर पुरस्कार फावो जाल्ले विश्वदीप दीपक चॅटर्जी हांणी केलां. केरळांतले दोन खेपे केरळ राज्य पुरस्कार जैतिवंत लिजू प्रभाकर एक कलरिस्ट म्हूण लघुपटा कडेन संबंदींत आसात. ह्या पंगडांत सिनेमॅटोग्राफर अमेय सिमेपुरषकार, एडिटर व्यंकटेश लगजी आनी पार्श्वसंगीत अभिषेक कदम हांचे आसा. हातूंत सोबिता कुडतरकार, श्रवण फोंडेकार, प्रणव टेंगसे आनी अमोदी सनप ह्या कलाकारांच्यो भुमिका आसात.
गोंयांतल्या चित्रपटमळाक मेळटली उर्बा
गोंयांतल्या लघुपटाची ही तोखणायेची कामगिरी गोंयांतल्या चित्रपटमळाक उर्बा दितली. तरणाट्या आनी प्रतिभावंत दिग्दर्शक आनी निर्मात्यांक ‘वाग्रो’ लघुपटाचो कान्स चित्रपट महोत्सवांत आस्पाव जाल्ल्यान उर्बा मेळटली. लघुपटाचो उद्देश म्हणल्यार उदेत्या कलागुणांक प्रोत्साहन दिवप आनी निर्मिती आनी उद्देग हांचे मदलो परस्पर संवाद सहज सोंपो करप आसा, अशें दिग्दर्शक साईनाथ उसकयकार आनी निर्मातो राजेश पेडणेंकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
