भांगरभूंय | प्रतिनिधी
म्हापशें: करासवाडो, म्हापशें जंक्शना वेल्या उड्डाणपुला खाला म्हाल व्हरपी ट्रकान धपको दिल्ल्यान जाल्ल्या अपघातांत श्याम बाबाजी मयेंकार (57, रा. करासवाडो) ह्या चलून वचपी मनशाक मरण आयलें. म्हापशें पुलिसांनी ह्या अपघाताक कारण थारिल्लो ट्रक ड्रायव्हर मिंगेल गोम्स (56, रा. सुर्ला, दिवचल) हाचे आड सदोश मनीसवधाचो गुन्यांव नोंद केला.
हो अपघात काल (शुक्रारा) सकाळीं 11.15 वरांच्या सुमाराक घडिल्लो. दुबावीत आरोपी ड्रायव्हर मिंगेल गोम्स हो आपलो आयचर म्हाल व्हरपी ट्रक घेवन धुळेर सावन थियेचे दिशेन वतालो. करासवाडाे उड्डाणपुला खाला रस्त्यान चलत वचपी मयत श्याम मयेंकार हांकां ह्या ट्रकान धपको दिलो. ट्रकाचो धपको बशिल्ल्यान मयत चलून वचपी हो रस्त्यार पडलो आनी ताच्या पांया वेल्यान ट्रकाचें रोद गेलें. मयत हो चलत म्हापशें जिल्हो हॉस्पिटलांत वतालो.
ह्या अपघातांत मयेंकार हे गंभीर जखमी जाले. तांकां रोखडेंच म्हापशेंच्या जिल्हो हॉस्पिटलांत एम्बुलन्सींतल्यान दाखल केले. उपरांत तांकां फुडल्या उपचारा खातीर बांबोळे गोय वैजकी म्हाविद्यालयांत धाडून दिले. थंय उपचार सुरू आसतना तांकां मरण आयलें.
म्हापशें पुलीस उपनिरिक्षक मंगेश पाळणी आनी हवालदार सतीश ठाकूर हांणी पंचनामो केलो. निश्काळजीपणान वाहन चलोवन निश्पाप चलून वचपी मनशाच्या मरणाक कारण थारिल्ल्याच्या आरोपा खाला भारतीय न्याय संहितेच्या कलम 281 आनी 106 (1) खाला पुलिसांनी दुबावीत ट्रक ड्रायव्हर मिंगेल गोम्स हाचे आड गुन्यांव दाखल केला आनी ताका अटक केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
