भांगरभूंय | प्रतिनिधी
पणजीः राज्यांतल्या 56 गांवांच्या शारीकरणा संबंदीं महसूल खात्यान जारी केल्ली अधिसुचोवणी फाटीं घेवपाच्या निर्णयाक गोंय प्रदेश काँग्रेस समितीचे अध्यक्ष गिरीश चोडणकार हांणी येवकार दिवन गोंयच्या लोकांच्या एकचाराचें हें इतिहासीक जैत आनी लोकां मुखार भाजपा सरकाराची हार अशें म्हणलें.
ह्या निर्णयाचेर प्रतिक्रिया दितना गिरीश चोडणकार हांणी सांगलें, ह्या विशयाचेर सुरवाती सावन काँग्रेस पक्षान खर भुमिका घेतिल्ली. गोंयच्या हिता खातीर झगडपी गांवचें नागरिक, ग्रामपंचायती, समाजीक संघटना आनी दरेका गोंयकार हांचे वांगडा काँग्रेस उबी रावली आनी भाजपा सरकाराच्या गांव शारीकरण करपाच्या निर्णयाक सेगीत विरोध केलो.
ही अधिसुचोवणी फाटीं घेवप म्हणल्यार भाजपा सरकारान लोकांचेर उपकार केल्ले ना. गोंयच्या लोकांच्या एकवटीत संघर्शाचें हें जैत आसा. हें जैत दरेका गांवचें, दरेक ग्रामपंचायतीचें, दरेका समाजीक संघटनेचें आनी गोंयची अस्मिताय तिगोवन दवरपा खातीर झगडपी दरेका गोयकारांचे अशें चोडणकार हांणी सांगलें.
गोंयचे लोक एकवटीत जाल्यार सत्ताधारी कितलेय अहंकारी आसले तरी तांकां लोकां मुखार हार मानची पडटा हें आयच्या निर्णया वयल्यान सिध्द जाता. हें जैत लोकशाय, जनशक्तीचे आनी गोंयची अस्मिताय हांचे खातीर आसा अशें गिरीश चोडणकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
