भांगरभूंय | प्रतिनिधी
काणकोणः चावडी-काणकोणां हेडग्या गोरवाक मोटारसायकलीचो धपको लागून मोटारसायकल चलोवपी गंभीर जखमी जालो. मडगांवच्या जिल्हो हॉस्पिटलांत ताचेर उपचार चलतात.
मेळटा ते म्हायती प्रमाण, हो अपघात चावडी- काणकोणच्या बस स्टँण्डा मुखार जालो. रस्त्यार बशिल्ल्या गोरवाक मोटारसाकलीचो धपको लागलो आनी तुळशीदास वागोणकार (35, चापोली-काणकोण) हो गंभीर जखमी जालो. तुळशीदास हाचे घर अपघात जाल्ल्या थळा सावन सुमार 3 किलो मिटर अंतराचेर आसा. तो सामान व्हरपा खातीर बाजारांत आयिल्लो. सामान घेवन तो परत वतना हो अपघात जालो. रस्त्यार बशिल्ली गोरवा ताका काळखाक लागून दिश्टी पडूंक ना आनी ताची मोटारसायकल सरळ गोरवाचेर चडली आनी दुसरे वटेन वचून पडली. हातूंत ताच्या मानेक आनी कमरेक दुखापत जाल्या आनी तो गंभीर जखमी जालो.
उपरांत लागीं आशिल्ल्या पिंक फोर्स गाडयेंतल्यान ताका काणकोणां हॉस्पिटलांत व्हेलो पूण ताची भलायकी गंभीर आनी हुस्क्याची आशिल्ल्यान ताका रोखडोच मडगांवच्या जिल्हो हॉस्पिटलांत धाडलो. सध्या ताचेर उपचार चलतात.
मजगतीं, खुबश्या वाठारांनी रस्त्यार गोरवा बशिल्ली आसता. हाका लागून अपघात जातात. अपघातांत मनशाक मरण योता, जखमी जाता तशेंच गोरवांकूय मरण येता, जखमी जातात. रस्त्यावयल्यो लायटी पेटनात ताका लागून रस्त्यार काळोख आसता. काळखांत रस्त्यार बशिल्ली गोरवा दिसनात आनी हाका लागून अपघात जातात. काल रातीं काणकोणां जाल्लो अपघात हो हाचेच एक उदाहरण.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
