भांगरभूंय | प्रतिनिधी
महाराष्ट्रांत शिक्षक पात्रताय परीक्षा फुडें धुकल्ली
मुंबय, खबरां संस्थाः शिक्षक भरती प्रक्रिये खातीर म्हत्वाची मानपी महाराष्ट्रांतली शिक्षक पात्रताय परिक्षेच्यो (टीईटी) प्रस्नपत्रिका लीक जाल्ल्यान ही परीक्षा फुडें धुकल्ल्या. ही परिक्षा आयतारा 28 जुनाक राज्यभरांतल्या 1,028 परीक्षा केंद्रांनी जावपाची आशिल्ली. नीट परिक्षे उपरांत पेपर लीक जावपाची आनी परीक्षा फुडें धुकलपाची आनीक एक घडणूक घडल्या.
परिक्षेची पारदर्शकता आनी विस्वासपात्रताय तिगोवन दवरपा खातीर परीक्षा फुडें धुकलपाचो निर्णय घेतला अशी महाराष्ट्र राज्य परिक्षा मंडळान शेनवारा अधिकृत घोशणा केल्या. नवे वेळापत्रक बेगीन जाहीर करतले अशेंय परिशदेन स्पश्ट केलां.
मेळिल्ले म्हायती प्रमाण, शेनवारा सकाळीं भिवंडी पुलिसांनी धाड घालून कांय व्यक्तीं कडल्यान टीईटी 2026 च्या सीलबंद प्रस्नपत्रिकांची कांय पानां जप्त केल्यात. ते उपरांत महाराष्ट्र राज्य परीक्षा मंडळाच्या अधिकाऱ्यांक थंय आपोवन संबंदीत कागदपत्रांची तपासणी केली.
प्राथमीक चवकशेंत परिक्षेच्या सुमार 24 वरां आदीं ठाणे वाठारांत प्रस्नपत्रिका लीक जाल्ल्याचें स्पश्ट जालें. पुलिसांनी कारवाय करून प्रस्नपत्रिका जप्त करून ह्या प्रकरणांत कांय जाणांक ताब्यांत घेतल्यात. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
