भांगरभूंय | प्रतिनिधी
भांगरभूंय । प्रतिनिधी
पणजीः कॉंग्रेसीत सगळ्यांक प्रवेश आसतलो. पूण तांणी कसलीच अट दवरची न्हय. ज्या पक्षांक भाजपाक हारोवचेंशें दिसता तांचे वांगडा युती करून आमचे विचारधारेच्या आदाराचेर कॉमन मिनीमम प्रोग्राम करतले. वेंचणूक केन्नाय येवं आमी तोंड दिवपाक तयार आसात अशें काँग्रेसीचे गोंय प्रभारी माणीकराव ठाकरे हांणी सांगले.
शेनवारा काँग्रेसीची राजकी वेव्हार बसका जाली. हे बसकेंत जाल्ले निर्णया विशीं म्हायती दितना ठाकरे उलयताले. ह्या वेळार प्रभारी अंजली निंबाळकार, गोंय काँग्रेसीचे प्रदेशाध्यक्ष गिरीश चोडणकार, विरोधी पक्ष फुडारी युरी आलेमांव, केपेंचे आमदार एल्टन डिकोस्टा आनी हळदोणचे आमदार कार्लुस फेरेरा हाजीर आशिल्लें.
राजकी वेव्हार बसकेंत खुबश्या मुद्द्यांचेर एकमत जाला. तातूंत काँग्रेसीची राज्य पांवड्यार ते बुथ पांवडया वेली समिती बळकट करपा खातीर तांचे कडल्यान 20 जुलय मेरेन सुचोवण्यो मागयल्यात, अशें ठाकरे हांणी सांगलें.
खुबशे इत्सुक काँग्रेस पक्षांत येवपाक तयार जाल्यात. बसकेंत हे विशीं चर्चा जावन सगळ्यांक प्रवेश दिवपाचे थारलां. पूण तांकां कसलीच अट घालीनासतना प्रवेश दितले. हे विशींची प्रक्रीया आनी तांचे फुडारा विशींचो विचार प्रदेश काँग्रेस करतले, अशें ठाकरे हांणी म्हणलें.
तशेंच युती बाबतींत विचार विनिमय करून निर्णय जाला. खंयचोय पक्ष जाका भाजपा आड झुजपाक जाय ताका येवकार दितले. पक्षाच्या विचारसरणीच्या आदाराचेर कॉमन मिनीमम प्रोग्राम थारायतले. प्रदेशाध्यक्षा कडेन चर्चा करून ज्या फुडाऱ्यांक हे विशींचे अधिकार दिवपाक जाय ते विशीं बसकेंत उलोवप जाला, अशीं म्हायती ठाकरे हांणी दिली.
आमी पक्षाचे धोरणात्मक निर्णय मुखार दवरला. वेंचणूक समितीचे अध्यक्ष युरी आलेमांव, घोशणा पत्र समितीचे अध्यक्ष विरीयातो फर्नांडीस आनी समन्वय समितीचे अध्यक्ष फ्रान्सिस सार्दिन हांकां काय दिसा भितर समितीचे वांगडी वेंचून काम सुरू करपाक सांगला. प्रदेशाध्यक्ष वांगडा चर्चा करून कोणांक घेवप काय ना हो निर्णय तांचो आसतलो, अशें ठाकरे हांणी सांगलें.
गोंय काँग्रेस प्रदेशाध्यक्षाचो ताबो घेतल्या उपरांत सगळ्यांत पयली राजकी वेव्हार समितीची बसका आपयिल्ल्याचे गिरीश चोडणकार हांणी सांगलें.
15 वर्सा भाजपान गोंयाचेर चलयिल्ले अत्याचार बंद करतले जाल्यार सगळे जाण एकठांय येवपाकूच जाय अशें गोंयचे लोक मागतात. देखून युती विशींची पयली चर्चा राजकी वेव्हार बसकेंत जाली. जे पक्ष भाजपाक हारावपाक सोदता तांचे वांगडा व्यापक अशी युती करपा खातीर एकमतान मान्यताय मेळ्ळ्या, अशें चोडणकार हांणी सांगलें.
विरीधो पक्ष फुडारी 22 सप्टेंबराक गोंय राखण यात्रेची घोशणा करतले. हे विशींचे सादरीकरण तांचेनी केला आनी हे यात्रेक लागून लोक काँग्रेसीकडेन आकर्शीत जातले. तशेंच कांय मतभेदाक लागून खुबशे लोक पक्षा पसून पयस जाल्या. त्या सगळ्यांनी पक्षांत प्रवेश करून भाजपा आड एकजुटीन वावरपा खातीर पक्षाक बळकटी दिवची असो उलो आयजे बसकेंत मारला, अशीं म्हायती चोडणकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
