भांगरभूंय | प्रतिनिधी
खबरां संस्था
नवी दिल्लीः आयएसएसएफ वर्ल्ड शूटींग सर्तींत भारताचे मेहुली घोष आनी शिव तुषार जोडयेन 10 मीटर ऍर रायफल मिश्र इव्हेंटांत भांगरा पदक जिखलें. भारत गुण क्रमवारींत दुसरे सुवातेर आसा. सर्तींत भारतीय शूटरांनी बरी कामगिरी करून दाखयली.
मेहुली- शिव जोडये उपरांत 10 मीटर ऍर पिस्तुल मिश्र इव्हेंटांत पलक आनी शिवा नगरवाल जोडयेन कांस्या पदक मेळयलें. तांणी कजाकिस्तानाच्या वलेरी रकिमजहान आनी इरिना लोक्तिओनोवा जोडयेक एकतर्फी लडतीत 10-0 च्या अंतरान हारयलें.
मेहुली आनी तुषार जोडयेन हंगेरीच्या इस्तजर आनी इस्तवान पेन जोडयेक 17-13 अश्या अतरान हारयले आनी भांगरा पदक आपल्या नांवार केलें. तुषारान भारता खातीर पयले खेप भांगरा पदक जिखलां, जाल्यार मेहुलीची ही दुसरी खेप आसा. मेहुलीन 2019 वर्सा दक्षीण आशियाई खेळांत काठमांडू हांगाक देशा खातीर पयलें भांगरा पदक मेळयल्लें.
बुधवाराक एक भांगर आनी एक कांस्या पदक मेळयतगीर भारत गुण क्रमवारींत दुसरे सुवातेर पावला. भारतीय शूटरांनी आतां मेरेन तीन पदकां जिखल्यांत. तातूंत दोन भांगराची आनी एक कांस्या पदकाचो आसपाव आसा. सर्बियाचो पंगड गुण क्रमवारींत पयले सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
