भांगरभूंय | प्रतिनिधी
अमिताभ शर्माः 12 हजार खेळगडे घेतले वांटो
भांगरभूंय । प्रतिनिधी
पणजी : गोंयांत जावपी 37वी राष्ट्रीय खेळां सर्त 25 ऑक्टोबराक सुरू जातली. 9 नोव्हेंबर मेरेन चलपी सर्तींत 11 ते 12 हजार खेळगडे वांटेकार जातले, अशी म्हायती खेळां सर्तीचे अध्यक्ष अमिताभ शर्मा हांणी एका राष्ट्रीय चॅनला कडेन उलयतना दिली. ह्या तारखां विशीं गोंय सरकारा कडल्यान मात दुजोरो मेळूंक ना.
राष्ट्रीय खेळां सर्तीचो लोगो तशेंच मस्कताचें उक्तावण जाल्ल्यान सर्त गोंयांत जावपाचें निश्चीत जालां. राष्ट्रीय खेळां सर्त ऑक्टोबर, नोव्हेंबरांत जातली, अशें मुख्यमंत्री डॉ. प्रमोद सावंत हांणी हाचे आदींच स्पश्ट केलां. प्रधानमंत्री नरेंद्र मोदी हांचे हस्तुकीं सर्तीचें उक्तावण जातलें. प्रधानमंत्र्यांचे उपलब्धते प्रमाण उक्तावणाची तारीख थारतली, अशें गोंय सराकारन सांगलां. मात 25 ऑक्टोबर ते 9 मेरेन गोंयांत सर्त जातली, अशी म्हायती अमिताभ शर्मा हांणी दिल्या. ह्यो तारखो निश्चीत आसात काय, हे जाणून घेवपा खातीर खेळां मंत्री गोविंद गावडे हांचे कडेन आयतारा संपर्क जावंक पावलो ना.
आतां मेरेन जाल्ल्या सर्ती परस गोंयांत जावपी 37वी राष्ट्रीय खेळा सर्त भव्य स्वरूपाची आसतली. खेळाचे 43 प्रकार आसतले. हाचे आदीं इतले प्रकार नाशिल्ले. इंडियन ऑलिंपिक संघटणा आनी गोंय सरकार हांच्या जोडपालवान ही सर्त जातली. सर्ती खातीर 200 ते 250 कोटींच्या निधीची तजवीज आसा. आयोजनाची तांत्रीक जापसालदारी ऑलिंपिक संघटणेची आसता. मुळाव्यो सुविधा तयार करपाची जापसालदारी राज्य सरकाराची आसता. गोंयांत मुळाव्यो सुविधा तयार जाल्या. गोंय हें पर्यटन थळ आसा. हाका लागून ही सर्त खाशेली जातली, असो विस्वास सर्तीचे अध्यक्ष अमिताभ शर्मा हांणी उक्तायली. खेळां सर्ती खातीर ज्यो सुविधा तयार जातात, ताचो त्या राज्याक लाव जाता. खेळगडे तशेंच वांटो घेवपी फेडरेशनाक पासांची वेवस्था आसतली. खेलो इंडिया खाला जावपी कार्यावळी आनी राष्ट्रीय खेळां सर्त हातूंत फरक आसा, अशें अमिताभ शर्मा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
