भांगरभूंय | प्रतिनिधी
शैलेश झिंगडेः विद्यालयांक पयशे दिवपाची तजवीज
भांगरभूंय । प्रतिनिधी
पणजीः हालींच मंत्रीमंडळात ‘म्हजी लॅब, बरी लॅब’ येवजणेक मान्यताय दिल्या. इंटरनॅट सयत हेर उपकरणांची वेवस्था करपा खातीर ‘म्हजी लॅब, बरी लॅब’ येवजणे खाला विद्यालयांक पयशें दिवपाची तजवीज आसतली. सरकार पयशें दितलो, तातूंतल्यान विद्यालय वेवस्थापकाक इंटरनॅट तशेंच हेर उपकरणांची वेवस्था करची पडटली. ही म्हायती शिक्षण संचालक शैलेश झिंगडे हांणी दिली.
‘म्हजी लॅब, बरी लॅब’ येवजणे खाला सगळ्या विद्यालयांनी इंटरनॅटची वेवस्था जातली. कांय विद्यालयांनी इंटरनॅट रेंज मेळना. तांकां खासा वायफाय सुविधा घेवपा सयत केबल वा हेर यंत्रणा बसोवची पडटली. हाचे खातीर तांकां अर्थीक मजत दितले. ज्या विद्यालयांक इंटरनॅट रेंज मेळटा, तांकां खासा यंत्रणा बसोवची पडची ना. तरी लेगीत सगळ्या विद्यालयांक येवजणे खाला अर्थीक मजत मेळटली.
यत्ता सवी ते आठवी मेरेन कोडिंग आनी रोबोटिक्स विशय शिकोवपाक सुरवात जाल्या. हाका लागून इंटरनॅट गरजेचें आसा. कोडिंग आनी रोबोटिक्स शिकोवपा खातीर ‘म्हजी लॅब, बरी लॅब’ येवजण फायद्याची थारतली, अशें झिंगडे हांणी सांगलें.
विज्ञान विशयाच्या प्रात्यक्षिकां खातीर लागपीं उपकरणां चडश्या विद्यालयांच्या प्रयोगशाळांनी आसात. थर्मामिटर, बॅरोमिटर, वर्नियर कॅलिपर हीं उपकरणां लेगीत घेवपाक मेळटली. पोरूंच्यान विद्यालयांनी कोडिंग आनी रोबोटिक्स शिकोवपाक सुरवात जाल्या. सप्तकांत एक वराचो हो वर्ग आसता. हे खातीर शिक्षकांक प्रशिक्षण लेगीत दिलां. ज्या विद्यार्थ्यांक अॅडवान्स कोडिंग आनी रोबोटिक्स शिकपाची उमेद आसा, तांचे खातीर अॅडवान्स अभ्यासक्रम शिकोपाक सुरवात जातली, अशेंय झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
