भांगरभूंय | प्रतिनिधी
भांगरभूंय । प्रतिनिधी
पणजीः परफ्युम तज्ज्ञ मोनिका घुर्डे हिचो दुबावीत खूनी राजकुमार ऊर्फ राजेश सिंग हाची मानसीक स्थिती बरी आसा असो अहवाल मानसीक भलायकी पुनरावलोकन मंडळान दिल्ल्यान ह्या खून प्रकरणाची सुनावणी 1 नोव्हेंबरच्यान परत सुरू जातली. राजेश सिंग हांची मानसीक स्थिती इबाडल्ल्यान सुनावणी बंद जाल्ली.
सांगोल्डें हांगच्या सपना राज व्हिलांतल्यान मोनिकाच्या फ्लॅटांत घुसून सुरक्षा रक्षक म्हणून काम करपी राजेश सिंगान 7 ऑक्टोबर 2016 दिसा तिचेर बलात्कार करून तिचो खून केल्लो. उपरांत तिचें एटीएम कार्ड घेवन तो फरारा जाल्लो. बंगळुरांत 10 ऑक्टोबराक एटीएमांतल्या मोनिकाचे पयशे काडिल्ल्यान गोंयच्या पुलिसांक ताचो माग लागलो आनी थंय वचून बंगळुरू पुलिसांचे मजतीन ताका एका हॉटेलांत अटक केल्ली.
अपमान करून आपल्याक कामा वयल्यान काडपाक लायलें आनी 22 हजार रुपयाचें अर्थीक लुकसाण केलें तचो सूड घेवपा खातीर आपणे मोनिकाचो खून केलो अशी जबानी सिंगान पुलीस चवकशे वेळार दिल्ली. 6 जानेवारी 2017 दिसा ताचेर म्हापश्याच्या पयलो वर्ग न्यायालयांत आरोपपत्र दाखल केल्लें. उपरांत ते पणजेच्या उत्तर गोंय जिल्हो आनी सत्र न्यायालयांत वर्ग केल्लें.
खून केशीची सुनावणी सुरू आसतना 2021 वर्सा राजेश सिंग हाची मानसीक स्थिती सारकी नाशिल्ल्याची म्हायती ताच्या वकिलान न्यायालयाक दिल्ल्यान ताची तपासणी करपाक न्यायालयान मानसीक भलायकी पुनरावलोकन मंडळ स्थापन केल्लें. ह्या मंडळांत निवृ्त जिल्हो न्यायाधीश अॅश्ली नऱ्होना, डॉ मुकूल महात्मे, डॉ अक्षदा आमोणकार, संजीवनी देसाय आनी केतकी गडेकार हांचो आसपाव आशिल्लो. तांणी राजेश सिंग हांची तपासणी करून तो बरो आसा असो अहवाल न्यायालयाक दिल्ल्यान केशीची सुनावणी परत सुरू करपाचें न्यायालयान थारायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
