भांगरभूंय | प्रतिनिधी
भांगरभूंय । प्रतिनिधी
दिवचलः सबका साथ सबका विकास हाच्या वांगडाच समाजांतल्या दरेका घटकाचें सपन प्रत्यक्षांत हाडपा खातीर प्रधानमंत्री नरेंद्र मोदी वावुरतात. लमृद्ध भारत आयज मोदी हांच्या फुडारपणा खाला देशाचो गौरव वाडला आनी देश संवसारीक म्हासत्ता जावपाचे वाटेर आसा अशें मुख्यमंत्री डॉ प्रमोद सावंत हांणी भाजपाच्या साखळी मतदारसंघांतल्या कार्यकर्त्यांच्या मेळाव्यांत उलयतना सांगलें.
वेंचणुकेंत आपल्याक सेगीत तीन फावट जैतिवंत करून साखळे मतदारसंघांतल्यान लोकांनी इतिहास घडयला. कार्यकर्ते ही म्हजी शक्त आसा आनी तांचे खातीर आपूण वावुरतलो अशें तांणी सांगलें. डॉ सावंत हांणी केंदांतल्या मोदी सरकाराच्या आठ वर्सांच्या वावराचो नियाळ घेतलो. भाजपा वावुरप्यांचो हो मेळावो साखळेच्या रवींद्र भवनांत आयोजीत केल्लो.
मेळाव्याक प्रदेश भाजपा अध्यक्ष सदानंद शेट तानावडे, केंद्रीय पर्यटन राज्य मंत्री आनी उत्तर गोंयचो खासदार श्रीपाद नायक, आदलो सभापती राजेश पाटणेकार, आदलो आमदार दयानंद सोपटे, भाजपा मंडळ अध्यक्ष गोपाळ सुर्लकार, मुख्यमंत्र्यांची घरकान्न सुलक्षणा सावंत, विठोबा घाडी, सुभाष मळिक, शुभदा सावयकार आनी हेर मानेस्त हाजीर आशिल्ले.
राजन फाळकार, सुलक्षणा सावंत, दयानंद सोपटे, राजेश पाटणेकार हांणी भाजपाची ध्येय धोरणाची म्हायती दिली. डॉ सावंत हांच्या फुडारपणा खाला विधानसभा वेंचणूक लडोवन भाजपान 20 मतदारसंघ जिखले. केंद्रांत आनी गोंयांत भाजपाचें डबल इंजीन सरकारान देशांत आनी राज्यांत प्रगती केल्या. आत्मनिर्भर भारत स्वयंपूर्ण गोंयचें सपन पुराय करपा खातीर डॉ सावंत वावुरतात अशें तानावडे हांणी सांगलें.
मोदीजी संवसारीक फुडारी जाल्यात, संवसार भारता कडेन आयज म्हासत्ता म्हणून पळयता. संवसारांत चालू आशिल्ले तणाव आनी झुजां थांबची हे खातीर मोदीजी देवदूत जावन मध्यस्ती करतात अशें श्रीपाद नायक हांणी सांगलें. येता ते लोकसभा वेंचणुके वेळार सगळो देश भाजपा फाटल्यान उबो रावतलो असो हावेस तांणी उक्तायलो.
मेळाव्यांत साखळे मतदारसंघांतल्या भाजपाच्या ज्येश्ठ फुडाऱ्यांचो भोवमान केलो. सूत्रसंचालन संतोष मळीक हाणे केलें आनी सुभाष मळीक हाणे निमाणे उपकार मानले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
