भांगरभूंय | प्रतिनिधी
भांगरभूंय । पत्रक
पणजीः देशाच्या भौशीक मळावयली आघाडेचे बँक ऑफ महाराष्ट्रान गिरायक जोडो आनी गिरायक भेट ही कार्यावळ सुरू केल्या. पुणे हांगा पी वाय सी जिमखान्यांत तिची सुरवात केली. ह्या वेळार बँकेचे वित्तीय सेवा विभागाचो सचीव संजय मल्होत्रा मुखेल सोयरे म्हणून हाजीर आशिल्ले.
वित्त विभागाचो जोड सचीव भूषण कुमार सिन्हा, वेवस्थापकीय संचालक आनी सीईओ ए एस राजीव, कार्यकारी संचालक ए बी विजयकुमार आनी आशिष पांडे ह्या वेळार हाजीर आशिल्ले. संजय मल्होत्रा हांचे येजमानके खाला बँकेच्या मुख्यालयांत बँकेच्या वरिश्ठ वेवस्थापनाची बसका जाली. तातूंत बँकेच्या कामगिरीचो नियाळ घेतलो. भौशीक मळावयल्या बँकांत वेवसायक विकसीत करपा खातीर बँकेन पयली सुवात मेळयल्ले खातीर मल्होत्रा हांणी बँक कर्मचाऱ्यांक परबीं भेटयलीं. गिरायकांची गरज मतींत घेवन बँकिंग सेवेची सुलभता वाडोवपा खातीर भारत सरकारान केल्ल्या सुदारणा चालीक लावपाक बँकेन प्राधान्य दिवचें अशें मल्होत्रा हांणी सांगलें.
गिरायक जोडो, गिरायक भेट कार्यावळ म्हणल्यार रिटेल, कृशी, मायक्रो, लघु आनी मध्यम उद्देगांक रीण वितरण आनी वित्तीय सक्षमीकरण हे खातीर बँके घेता त्या तकालसीचें दृश्य स्वरूप आसा. ताका लागून बँकिंग सेवे पसून वंचीत आशिल्ल्या घटकां मेरेन वचून ताकां बँकिंग सेवा दिवपाक बँक येसस्वी जाल्या अशें ए एस राजीव हांणी सांगलें.
कार्यावळींत 1000 कोटी परस चड रकमेची रीण मजुरी पत्रां वितरीत केली. बँकेचो कार्यकारी संचालक आशिष पांडें हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
