भांगरभूंय | प्रतिनिधी
पणजी : फाटल्या कांय दिसां पसून राज्यांतल्या कांय चर्चेचे धर्मगुरू प्रार्थनासभा वेळार हिंदू देवता, छत्रपती शिवाजी महाराज हांच्या विरोधांत वादग्रस्त विधान करपाचे व्हिडियो सोशल मिडिया वयल्यान व्हायरल जातात. ह्या प्रकारांचेर गोंयचे आर्चबिशप फिलीप फेर्रांव हांणी एक प्रसिद्धी पत्रक जारी करून धर्मगुरूंक शिटकायलां. अशी वादग्रस्त विधानां करप टाळचें, कोणेय तशेंच केल्यार संबंदितांचेर कारवाय करची, अशेंय तांणी स्पश्ट केला.
फाटल्या म्हयन्यांत फादर बोलमेक्स पेरेरा हांणी छत्रपती शिवाजी महाराज हांचे विशीं वादग्रस्त विधान केल्लें. ते उपरांत परतून एका फादरान हिंदू देवता विशीं आक्षेपार्ह विधान केले. हाका हिंदूनी तशेंच हिंदू संघटणांनी आक्षेप घेतला.
वयल्या प्रकारा उपरांत दोनूय दिसां पयलीं मुख्यमंत्री डॉ. प्रमोद सावंत हांणीच अशी विधानां करप्यांक शिटकावणी दिल्या. दरेकल्याक आपले आवडीच्या देवाची पूजा करपाचो अधिकार आसा. खंयच्या धर्माचें समर्थन करपाचे वा तत्वज्ञानाचेर विस्वास दवरपो हो प्रत्येकाचो प्रस्न, अशें तांणी म्हणिल्लें.
मजगतीं, चर्चच्या धर्मीक मंचाचो वापर हिंदू देवतांच्या अपप्राचारा खातीर धर्मगुरू कडल्यान जावपाक लागला, असो आरोप हिंदू रक्षा म्हाआघाडीचे राज्य निमंत्रक सुभाष वेलिंगकार हांणी केल्लो. हिंदू विरोधी प्रचारा खातीर आर्चबिशपान हिंदू समाजाची माफी मागची, अशी मागणी तांणी केल्ली. हिंदुत्ववादी संघटणांनी घेतिल्ली भुमिका आनी मुख्यमंत्र्यांनी दिल्ले शिटकावणे उपरांत आर्चबिशप फेर्रांव हांणी शेनवारा एक पत्रकार परिशद घेवन, वादग्रस्त विधानां करपी धर्मगुरूंक समज दिली. एकामेकांच्या धर्मांचो आदर करपात, एकवट राखात. चर्चच्या वांगड्यांनी हालींच केल्ली विधानां योग्य न्हय. चर्चीन तांचेर कारवाय करची. तशेंच धर्मगुरुंनी अशा प्रकाराची वादग्रस्त विधानां टाळची, असो उलो फेर्रांव हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
