भांगरभूंय | प्रतिनिधी
नारायण गाडः अर्थीक फटवणूक संबंदीत फायली शेणच्यो न्हय हेच खातीर दुसरे कडेन बदली
भांगरभूंय । प्रतिनिधी
पणजीः सोरो विक्री परवान्यांच्या नुतनीकरणांतल्यान परवानेधारकांची अर्थीक फटवणूक केल्ल्या पेडणें कार्यालयांतल्या क्लार्काचेर रोखडीच कारवाय जातली, अशी हमी अबकारी आयुक्त नारायण गाड हांणी बिरेस्तारा ‘भांगरभूंय’ कडेन उलयतना दिली. हें प्रकरण लक्षांत आयले उपरांत ताचे कडल्यान हे संबंदांतल्यो फायली शेणच्यो न्हय, हे खातीर ताची बदली केल्या, अशेंय तांणी सांगलें.
सोरो विक्री परवान्यांचें नुतनीकरण करपाचें शुल्क ऑनलायन आनी ऑफलायन अशा दोनूय तरांनी स्विकारतात. ऑफलायन पद्दतीन घेतिल्ल्या शुल्काचें चलन परवानेधारकांक दिवचें पडटा. ते प्रमाण कांय परवानेधारकांनी पेडणें कार्यालयांत वचून ऑफलायन पद्दतीन शुल्क भरलें. त्या बदल्यात तांकां चलनूय दिलें, पूण तें बनावट आशिल्ल्याचें उजवाडाक आयलां. आतां मेरेन अशे तरेच्यो कागाळी 70 ते 80 सोरो वेवसायिकांनी केल्यात, अशें गाड हांणी सांगलें.ह्या प्रकारा विशीं फाटल्या म्हयन्यांभरा सावन कागाळी येवपाक सुरवात जाले उपरांत आपूण तत्काळ चवकशी समितीची नेमणूक करून ह्या प्रकरणांत चवकशी सुरू केली. चवकशी काळांत संबंदीत क्लार्क पेडणें कार्यालयांतूच राविल्लो जाल्यार तो ह्या संबंदांतल्यो फायली वा कागदपत्रां शेणोवपाचो. हातूंत तो आडखळी हाडपाचो. ताका लागून ताची हेर कडेन बदली केली. ते उपरांत चवकशी समितीच्या अहवालांतल्यान घोटाळो जाल्ल्याचें उजवाडाक आयलें, अशें गाड हांणी सांगलें.
तेचवरी हे संबंदांत ज्या सोरो विक्री परवानेधारकांनी कागाळी केल्यात, तातूंत फक्त एकाच क्लार्काचें नांव मुखार आयलां. ताका लागून आतां ताची चवकशी करून ह्या प्रकरणांत आनीक कोणाचो हात आसा काय कितें ताचो सोद घेतले आनी दोशी आशिल्ल्या सगळ्यांचेरूय कारवाय करतले, अशीय म्हायती गाड हांणी दिली. मजगतीं, अबकारी खात्याच्या पेडणें विभागांतल्या क्लार्कान सोरो विक्री परवान्यांचे नुतनीकरण करपा खातीर आयिल्ल्या खुबशा जाणांक सुमार दोन कोटी रुपयांची तोपी घाल्ल्याची खबर एका इंग्लीश दिसाळ्यान बिरेस्तारा उजवाडाक हाडले उपरांत पुराय गोंयांत खवदळ पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
