भांगरभूंय | प्रतिनिधी
दिसाक 3 इंचां परस चड पावस, पावसान हुपलो पाव शेंकडो
पणजी : हवामान खात्याच्या अदमासा प्रमाण गोंयांत पावसाचें धुमशेण सुरूच आसा. दिसाक सरासरी 3 इंच पावस नोंद जाल्ल्यान आतां मेरेनच्या पावसान पाव शेंकडो हुपलाे. आतां मेरेन 666.2 मिमि पावस (26.2 इंच) नोंद जाला. सरासरी परस हें प्रमाण 14 टक्के उणें आसा.
हवामान खात्यान आयज ‘ऑरेंज अॅलर्ट’ जाल्यार फुडले तीन दिस ‘येलो अॅलर्ट’ जारी केला. वराक 40 किमि परस चड गतीन वारें वांव्हतलें. हाका लागून नुस्तेमारांनी नुस्तेमारी खातीर दर्यांत देंवचें न्हय अशी शिटकावणी हवामान खात्यान दिल्या.
फाटल्या कांय दिसा प्रमाण आयतारा सकाळीं गोंयभर नेटाचो पावस पडलो. दनपारां तिना उपरांत पावसाचो नेट उणो जालो. सकाळीं मात थारावीक काळान पावसाच्यो दडको पडत रावल्यो. पावसाक लागून अदीं मदीं वीज पुरवण खंडीत जाताली. सगल्यांक झाडां पडपाचे प्रकार घडले. सोमारा सावन पावस सेगीत पडत आसा. मॉन्सून येतकूच पयले दोन दीस पावस पडलो. उपरांत पावसाचो नेट उणो जालो. हाका लागून पावसाची तूट वाडत गेली. मात उण्या दाबाच्या पट्ट्याक लागून फाटल्या सोमारा सावन परतून नेटाच्या पावसाक सुरवात जाली.
मंगेशी, बेतोडें, दोना पावला, पेडणें, कुडचडें, ढवळी, सांगें, कांदोळी, काणकोण हांगां झाडां पडलीं. ह्या झाडांक लागून त्या त्या वाठारांतली वीज पुरवण खंडीत जाली.
सांखळे साडे चार इंच पावस
फाटल्या 24 वरांत सांखळे सगल्यांत चड 111 मिमि (साडे चार इंच) पावसाची नोंद जाल्या. हाचे उपरांत वाळपय 106.4 मिमि, फोंडें 95 मिमि, पेडण्यां 92.8 मिमि, मुरगांव 70.8 मिमि, सांगें 69.3 मिमि, काणकोण 60.2 मिमि, मडगांव 58, दाबोळी 54.8, पणजी 49.4 मिमि पावसाची नोंद जाल्या.
आतां मेरेनचो पावस
ठिकाण पावस (मिमि)
म्हापशें 653.8
पेडणें 810
फोंडें 624
पणजी 664.6
सांखळी 515
वाळपय 616.9
काणकोण 738.2
दाबोळी 631.5
मडगांव 286.9
मुरगांव 812.1
सांगें 560.6
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
