भांगरभूंय | प्रतिनिधी
आंतोनी विशीं एक खास गजाल. ह्या एकूच सांताक ताच्या पयल्या मर्णाच्या वर्सा दिसा आल्ताराचो मान फावो जाल्लो आसा. आयज 13 जुनाक ताची पुण्यतीथ. ते निमतान….
पादुआचो सांत आंतोन हो पुर्तुगालाचो आस्कारी. आयज तो आख्ख्या संवसाराचो जाला. ताका पयणाऱ्यांचो, गर्भेस्त आनी भुरगीं नाशिल्ल्या आवयांचो, अशक्तांचो आनी दुबळ्यांचो प्रामाणीक आस्कारी म्हूण पाचारतात. दर्यांत आशिल्लीं तारवां तुफानाक सांपडटात तेन्ना, आंतोनीक उलो मारतात. ताका सांडिल्ल्यो वस्तू, ऑत्मे आनी जनावरांच्या सोदा वेळारूय उलो मारतात. पावस पडनासतना दुकळ पडल्यार ताची मध्यस्ती खूब फायद्याची थारता. सगळ्या थरावेल्या भावार्थ्यांच्या मोगाच्या सांताची थोडिशी वळख.
जल्म आनी वाड
सांत आंतोन १५ ऑगस्ट ११९५ दिसा लिसबोआ- पुर्तुगालाक, एका गिरेस्त कुटुंबांत जल्मलो. विसेंत मार्टिन्स ताचो बापूय जाल्यार तेरेजा पायस तावेरा ताची आवय. पवित्र स्नाना वेळार ताका फेर्नांदो मार्टिन्स दे बुल्होंस हें नांव घाल्लें. ताचें मुळावें शिकप लिसबोआच्या कातेद्राल स्कुलांत जालें. पंदरा वर्सांचे पिरायेर, तो आगुस्तिनियन मठवाशी संस्थेंत भितर सरलो. दोन वर्सां उपरांत १२१२ वर्सा आपणाक कोंयब्राच्या घरांत व्हर म्हूण ताणें व्हडिलां लागीं मागलें. कित्याक लिसबोआक जायते इश्ट आनी सोयरे ताका मेळूंक येताले जाका लागून ताचें मन विचलीत जातालें. कोंयब्राक ताणें शिकप आनी मागणें करून आठ वर्सां सारलीं. ताचें शिकप म्हणल्यार पवित्र पुस्तकाची खेरीत जाणवाय, ती मनांत धरूंक, देवान ताका खेरीद हिकमत दिल्ली.
मठवाशी जिवीत
आंतोन फकत पंचवीस वर्सांचो तरणाटो आसतना कांय फ्रान्सिस्कन मठवाश्यांक मोरोक्को देसांत मुसलमानांनी जिवेशीं मारल्यात म्हूण ताणें आयकलें. तेन्ना ताचें काळीज खूब रडलें. जेजू पासत आपुणूय आपलें जिवीत भेटयतलो म्हूण ताच्या मनांत जालें. पूण आगुस्तिनियन संस्था एक मिसियोनार संस्था नाशिल्ली देखून ताका थंय वचूंक मेळना जालें. तेन्ना ताणें आगुस्तिनियन संस्थेंत केल्ल्या आंगवणांतलो आपणांक मेकळो करूंक मागलें. रोखडीच ताका परवानगी मेळ्ळी आनी १२२१ वर्सा, तो फ्रान्सिस्कन संस्थेंत भितर सरलो. ताणें आपलें नांव बदलून आंतोन नांव घेतलें. रग्तसाक्षी जावंचे आशेन तो साराचेन्स मोरोक्को देसांत वचूंक भायर सरलो. पूण वाटेर तो पिडेक सांपडलो आनी ताका आपलीं पावलां फाटीं घेवंचीं पडलीं. पर्थून येवंक जें तारूं ताणें धरिल्लें, तें एका तुफानाक सांपडून, सिचिलेच्या मेस्सिना शाराच्या बंदरार पावलें.
एक खडेगांठ प्रवचनकार
म्हणटात, देव करता तें बऱ्याकूच करता म्हूण. सिचिले थावन आंतोन तुस्कानी गांवांत गेलो. थंय ताका ऑर्द मुदार करची पडटाली पूण ताचे अशक्त भलायकेक लागून ताका रोमाग्नाच्या फर्ली गांवांत धाडलो. थंय ताणें आपलो वेळ मागण्यांत आनी अभ्यास करूंक सारलो. त्याच १२२२ वर्सा, फर्ली गांवांत, फ्रान्सिस्कनांची आनी डॉमनिकनांची याज्ञिकी संस्कार्णी आशिल्ली. पूण प्रवचन करूंक कोणाक सांगूंक नाशिल्लें. प्रवचन फ्रान्सिस्कन करतले म्हण डॉमनिकन चिंत्ताले, कित्याक संस्कार्णी तांच्या मठांत जाताली. पूण प्रवचन डॉमनिकन करतले म्हण फ्रान्सिस्कनांनी चिंतलें, कित्याक तांची संस्था प्रवचनकारांची संस्था आशिल्ली. ह्या वेळार अकस्मात आंतोनी लागीं सेर्मांव करूंक मागलें. ताणें न्हयकार दिलो पूण ताचें कोणें आयकलें ना आनी ताका सांगलें पवित्र ऑत्म्याचे प्रेरणेन उलय म्हूण. उपरांत ताणें असो सेर्मांव केलो की, सेर्मांव आयकतल्या सगळ्यांक ताणें दिपकायले. आनी तेच घडये थावन ताका फांकी प्रवचनकार म्हण मान फावो जालो.
ह्या वेळार तो रावतालो त्या घरांतलो काडून ताका लंबार्द्य शारांत प्रवचवन करूंक पाटयलो. लोक आपलो वेपार-धंदो आनी हेर कामां सोडून, ताचे सेर्मांव आयकूंक येवंक लागलो. बसूंक सुवात मेळचे खातीर, अस्तुऱ्यो सकाळ फुडें उठून, इगर्जेंत वताल्यो. लोकाचे उर्पंजीक लागून, केन्ना-केन्नाय ताका उगत्या मैदानार सेर्मांव करचें पडटालें. आंतोन देवाच्या उतराचो हुशार पर्गटणार जालो आनी ताच्या भागेवंतपणाची किर्ती सगळ्याक शिंपडली.
एक पावट नव्वो ग्रेगर भागेवंत बापान ताचो सेर्मांव आयकलो. कितले खोलायेन, उर्बेन आनी नेटान आदलो आनी नवो करार वापरून आंतोन सेर्मांव करता तें पळेवन, ताची तोखणाय करून ताणें म्हणलें: “तो खऱ्यानींच कराराची आर्कपेट, कारण आर्कपेटींत कराराच्या कायद्यांच्यो दोन फातरी आशिल्ल्यो.”
आसिसीच्या फ्रांसिस्काची भेट
आंतोनीक नवी झुटी दिली. ताका बोलोग्नांतल्या रोमाग्नांत आशिल्ल्या फ्रांन्सिस्कन प्रांतांत धाडलो. थंय ताची भेट संस्थेचो घडणार, आसिसीच्या सां फ्रान्सिस्का कडेन जाली. दोगूय खाल्ती मनीस, एकामेकाक खूब मानले.
आगुस्तिनान मठवाश्यां लागीं जी पवित्र पुस्तकाची शिकवण घेवंक सुरू केल्ली, ती फ्रान्सिस्कन संस्थेंत येतच ताका भोवच फायद्याची जाली. ताणें सांत आगुस्तिनाचें चिंतप आनी बरप बरें आपणायलां म्हण हे सन्स्थेच्या घडणारान पळेलें. १२२४ वर्सा आसिसीच्या फ्रान्सिस्कान ताका आपले संस्थेचो, देव-शास्त्र शिकोवपी म्हण नमियारलो. पयलें ताणें बोलोग्ना शारांत शिकयलें. उपरांत दक्षीण फ्रान्सांत ताणें आलबिगेन्सियान ह्या धर्मविरोध्यां आड कडक झूज मांडलें. ताणें मोंतपेळेर आनी तौलौस्से आनी आनिकूय शारांनी शिकयलें. हाका लागून ताका नांव पडलें “धर्मविरोध्यांचो तुतयो”. ते उपरांत ताणें पूय आनी लिमोगेस हांगाय शिकयलें.
मिलाग्रिंचो कुंवर : तीन देखी
एक : सत्राव्या शेंकड्यांत थावन आंतोनिच्यो इमाजी बाळका जेजूक आपल्या हातांचेर खेळयतना दिसतात. हाचे फाटली गजाल – आंतोनिच्या एका इश्टान चावियेच्या बुराकांतल्यान एकदां अशें देखलें: बाळक जेजू मेजार उग्तें आशिल्ल्या पुस्तकार उबो रावून आंतोनिच्या गळ्याक आपल्या दोनूय हातांनी घट्ट वेंग मारून आशिल्लो. वेलाजकेज, मुरिल्लो आनी राफायल असल्या फांकी कलाकारांनी सांत आंतोनीक विज्मितां करतना चित्रायला. पेसिलिनोचें एक चित्र अशें दाखयता: आंतोन एका इमट्याचें काळीज पयश्यांचे पेटेंतलें काडून उडयता. केन्ना केन्नाय ताचें निर्मळपण आनी जाणवाय दाखोवंक, ताका कोनेल-फूल (लिली) आनी पुस्तकां बराबर दाखयला.
दोन : एक पावट तौलौजे शारांत एका धर्मविरोध्यान आंतोनीक जेजुच्या आसण्या विशीं एक आव्हान दिलें: “हांव एका गाढवाक जेवण दिनासतना तीन दीस दवरतां. तीन दिसां उपरांत हांव ताका तण आनी जोंधळे दितां. गाढूं, जेवण सोडून, भोव पवित्र साक्रामेंताक भजता जाल्यार, तूं जिखलो.” आंतोनीन आव्हान स्विकारलें. तीन दीस गेले. गाढव खूब भुकेल्लें आशिल्लें. आंतोनीन गाढवाक पवित्र ऑस्त दाखयली. गाढवाच्या धनयान ताका तण आनी जोंधळे दाखयले. आनी अजाप! गाढूं आपलें जेवण सोडून, भोव पवित्र साक्रामेंताक नमस्कार करूंक लागलें. धर्मविरोधी आपलें मन बदलून बरो काथॉलीक जालो.
तीन : आंतोन स्तोत्रांच्या पुस्तकाचेर नियाळ करतालो आनी ताचेर कितें बरोवंक सोदतालो. अकस्मात ताचें तें पुस्तक ना जालें. आपणाक हें पुस्तक परत दी म्हण तो देवा लागीं मागूंक लागलो. दुसरे वटेन पुस्तक चोरिल्लो तो नवशीस एक नद पार करूंक वतना, ताका एक दर्शन जालें आनी हें पुस्तक परत दी म्हण कळीत जालें. नवशिसान तें पुस्तक हाडून परत आशिल्ल्या जाग्यार दवरलें.
खेरीदपण
आंतोनी विशीं एक खास गजाल. ह्या एकूच सांताक ताच्या पयल्या मर्णाच्या वर्सा दिसा आल्ताराचो मान फावो जाल्लो आसा. जेन्ना ताचो फोंड उगडलो तेन्ना ताची जीब जिवी आनी ताजी, एका जिव्या मनशाची आसता, तशी मेळ्ळी आनी ताच्या सर्व-व्हडिलान फ्रेई बोवेंतुरा (उपरांत होय सांत जातलो) हाणें ती जीब आपल्या हातांत घेवन देवाक वाखाणलो. ही जीब एके भांगराचे रेलिकेंत पादूआ कातेद्रालांत, इटलीक सांबाळून दवरिल्ली आसा. सांत आंतोन सदांच म्हणतालो: “उतरां परस करण्यो अदीक म्हत्वाच्यो. तुज्या उतरांनी तुका शिकवं आनी तुज्यो करण्यो उलोवं. आमचे लागीं जायतीं उतरां आसात, पूण करण्यो नात.” आयज मिलाग्रिंचो कुंवर आंतोनिचें देवोसांव संवसारभर चलता.
मरण आनी भागेवंतपण
आंतोन फकत ३६ वर्सांचे पिरायेर, जुनाची १३, १२३१ वर्सा, पादूआ शारांत सोंपलो. सगळो लोक ताका सांत म्हण पाचारतालो, हेच खातीर एका वर्सा भितर, १२३२ वर्सा, भागेवंत बापान ताका सांत म्हण पर्गट केलो. १९४६ वर्सा, बारावो पीवस भागेवंत बापान, ताका पवित्र सभेचो देवशास्त्री म्हण पाचारलो. बारावो पीवस भागेवंत बापान, आंतोनिचे पवित्र पुस्तकाचे जाणवायेक लागून, ताका ‘पवित्र पुस्तकाचो शास्त्री’ म्हण पर्गट केलो. ताच्या मानाक “सांत आंतोनिचो उंडो” ही संस्था उपजली. आपल्या जिविताचीं निमाणीं वर्सां ताणें इटलीच्या पादुआ शारांत सारलीं, देखून ताका पादुआचो सांत आंतोन म्हणटात.
—
– विन्सी क्वाद्रूस, राय, साश्ट
मो. – ९८२२५८७४९८
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
