भांगरभूंय | प्रतिनिधी
सुमार 10 लाखांचें लुकसाण
पणजीः पणजे दोन माळयांच्या काझा मॉडर्न रेस्टॉरंटाक बुधवारा फांतोड्डेर उजो लागून पुराय रेस्टॉरंट लासून गोबर जालो. उजो पालोवपी दळान वेळारूच उज्याचेर नियंत्रण मेळयिल्ल्यान इमारतींतल्या हेर दुकानांनी उजो पातळूंक ना. ह्या उज्यांत रेस्टॉरंटाचें सुमार 10 लाख रुपयांचें लुकसाण जालां.
मेळिल्ले म्हायती प्रमाण पणजे हॉटेल काफे भोसले आशिल्ल्या इमारतींतल्या काझा मॉडर्न रेस्टॉरंटांतल्यान धुंवर येता अशी म्हायती उजो पालोवपी दळाक मेळ्ळे उपरांत तांणी थंय धांव घेतली.
दोन मजली रेस्टॉरंटाचें शटर बंद आशिल्ल्यान तशेंच भितर वचपाक एकूच वाट आशिल्ल्यान उज्याचेर नियंत्रण मेळोवपाक अडचण येताली. ते उपरांत जवानांनी शटर तोडून भितर प्रवेश केलो आनी उज्याचेर नियंत्रण मेळयलें. ताका लागून इमारतींतल्या हेर भागांत उजो पातळूंक ना.
मजगतीं, रेस्टॉरंटाक उजो कसो लागलो हाचें नेमके कारण समजूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
