नीरज चोपडान रचलो इतिहास

भांगरभूंय | प्रतिनिधी

नीरज चोपडान झ्युरिच शारांत जाल्ले डायमंड लीग फायनलींत पयली सुवात मेळोवन इतिहास घडयलो. डायमंड लीग करंड जिखपी नीरज चोपडा पयलो भारतीय अॅथलीट थारलो.

झ्युरिचांत जाल्ले फायनलींत नीरज चोपडान 88.44 मिटराच्या सर्वोत्कृश्ठ थ्रो सयत वस्तादपण जोडलें. नीरजान फायनलींत झेक प्रजासत्ताकाच्या याकुब वाडलेज आनी जर्मनीच्या ज्युलियन वेबर हाका हारयलो. वाडलेजान 86.94 मिटराच्या सर्वोत्कृश्ठ थ्रो सयत दुसरी आनी जर्मनीच्या वेबरान 88.73च्या थ्रो सयत तिसरी सुवात मेळयली.

झ्युरिच डायमंड लीग फायनलींत नीरजाची सुरवात बरी जाली ना. चुरशीचे मॅचींत नीरजाचो पयलो थ्रो फावल थारलो. पूण, दुखापतींतल्यान पुर्ण बरो जावन मैदानांत देंवपी नीरजान दुसऱ्या यत्नांतूच प्रतिस्पर्धी खेळगड्यां परस खूब मुखार गेलो. ताणें दुसऱ्या यत्नांत 88.44 मिटर इतलो पयस भालोफेक केलो. तिसऱ्या यत्नांत ताणें 88 मिटर, चवथ्या यत्नांत 86.11 मिटर, पांचव्या यत्नांत 87 मिटर आनी सव्या यत्नांत 83.60 मिटर भालोफेक केलो.

नीरज लुसानांत डायमंड लीग जिखपी भारताचो पयलो भालोफेक खेळगडो थारिल्लो. मजगतीं, नीरजान जुलयांत अमेरिकेंत जाल्ले संवसारीक वस्तादपण सर्तींत रुप्या पदक जिखिल्लें. पूण, सर्ती वेळार ताका दुखापत जाल्ली. ताका लागून नीरजाक बर्मिंहॅम राष्ट्रकूल खेळां सर्त चुकिल्ली.

दुखापतींतल्यान पुर्ण बरो जावन मैदानांत देंवपी नीरजान लुसानांत पयल्याच यत्नांत 89.08 मिटर भालोफेक करून वस्तादपण जोडिल्लें. त्या वेळार दुखापतीचो ताचेर परिणाम जाल्लो दिसूंक ना. नीरज 2017 आनी 2018त डायमंड लीग फायनल्सा खातीर पात्र जाल्लो. पूण, 2017त तो सातवे सुवातेर आनी 2018त चवथे सुवातेर उरिल्लो.