भांगरभूंय | प्रतिनिधी
वर्साची दुसरी ग्रॅण्ड स्लॅम फ्रॅंच ओपन टॅनीस सर्तीच्या दादल्यांच्या एकोड्या गटांत पयल्या चार सिडेड खेळगड्यांनी जैत जोडून फुडले फेरयेंत सुवात मेळयली. जाल्यार बायलांच्या गटांत चवथे सिडा वयली खेळगडी सक्कारीक हारीक तोंड दिवचें पडलें.
संवसारीक क्रमवारींत पयले सुवातेर आशिल्ल्या सर्बियाच्या नोवाक जोकोविचान अॅलेक्स मोलकनाक 6-2, 6-3 7(7)-6 (4) अशा फरकान हारयलो. जाल्यार पांचव्या सिडा वयलो क्ले कोर्टाचो बादशा राफायल नादालान सी मॉटेटाक 6-3, 6-1 आनी 6-4 अशा सरळ सेटांनी हारयलो.
ह्या जैता सयत तो ग्रॅण्ड स्लॅमांत 300 मॅची जिखपी खेळगड्यांचे वळेरेंत पावलो. ताचे आदीं हो पराक्रम रोजर फॅडरर आनी जोकोविच हाणें केला.
दादल्यांच्या एकोड्या गटांतले आनीक एके मॅचींत तिसऱ्या सिडा वयल्या अॅलेक्झेंडर झ्वेरेवान सुरवातीचे दोन सेट वगडायल्या उपरांत मॅचींत पुनरागमन करतना एस बेजाक 2-6, 4-6, 6-1, 6-2 आनी 7-5 असो हारयलो.
बायलांच्या एकोड्या गटांत चवथ्या सिडा वयली खेळगडी मारिया सक्कारीक हारीचो धपको सोंसचो पडलो. तिका बिगर सीड खेळगडी कॅरोलिना मकोवान 7-6 आनी 7-6 अशा सेटांनी हारयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
