भांगरभूंय | प्रतिनिधी
-विद्या समिक्षा केंद्रा वरवीं विद्यार्थी, शिक्षकांच्या कामगिरीचेर नदर
पणजी : उच्च शिक्षणांत राष्ट्रीय शिक्षण धोरणाच्या अंमलबजावणेक लागून विद्यार्थ्यां मुखार दोट्टी पदवीचो पर्याय उपलब्ध जातलो. उच्च शिक्षणांत बरेच पर्याय विद्यार्थ्यां मुखार उपलब्ध जातले, अशें मुख्यमंत्री डॉ. प्रमोद सावंत हांणी सांगलें. दोनापावला राजभवन दरबार सभाघरांत शिक्षक दिसाचीं कार्यावळ जाली. राज्यांतल्या 8 शिक्षकांक ‘मुख्यमंत्री वशिश्ठ गुरू’ पुरस्कारान भोवमानीत केले.
शिक्षणांतल्या मुळाव्या सुविधां मदीं हेर राज्यांचे तुळेंत गोंय राज्य फुडें आसा. राष्ट्रीय पांवड्यार नामना जोडपाची तांक गोंयच्या विद्यार्थ्यां मदीं आसा. ते खातीर शिक्षकांक खासा यत्न करचे पडटले, अशें मुख्यमंत्र्यांनी सांगलें.
फुडली पिळगी घडोवपाची जापसालदारकी शिक्षकांची आसा. भुरग्यांचेर संस्कार करपाची जापसालदारकी शिक्षकां सयत पालकांची लेगीत आसा. गांवगिऱ्या वाठारांत शिक्षण, फुडार हाचे विशीं पालकांक कितेंच खबर नासता. अशें स्थितींत विद्यार्थ्यांक फुडारा विशीं मार्गदर्शन करपाची जापसालदारकी शिक्षकाची आसता. परंपरीक शिक्षणा सयत सरकारान कुशळटाय शिक्षणाचेर भर दिला. रोजगार उपलब्ध करपा खातीर अॅप्रेंटिसशीप येवजण सुरू केल्या. गोंयांत चर्चा जाता तितली बेकारी ना. काम करपाची इत्सा आसा, तांकां काम मेळटा. कोडींग आनी रोबोटिक्स अभ्यासक्रम सुरू करपी गोंय हें पयलें राज्य आसा. आतां विद्या समिक्षा केंद्र सुरू जाता. विद्या समिक्षा केंद्रा वरवीं दरेका विद्यालयांतले शिक्षक आनी विद्यार्थ्यांचेर नदर दवरप शिक्षण खात्याक शक्य जातले. विद्या समिक्षा केंद्र बेगिनूच सुरू जातले, अशें मुख्यमंत्री डॉ. प्रमोद सावंत हांणी सांगलें.
हॉस्पिटॅलिटींत मनीसबळ तयार करपाचें आव्हान
पर्यटन हो गोंयचो मुखेल उद्देग. हॉस्पिटॅलिटी हो उद्देग पर्यटना कडेन संबंदींत आसा. हॉस्पिटॅलिटी उद्देगाचो नेटान विस्तार जायत आसा. फावो त्या प्रमाणांत मनीसबळ तयार करपाचें आव्हान आसा. हाचे खातीर आयटीआय मदीं हॉस्पिटॅलिटी अभ्यासक्रम सुरू जाला. गोंयांत हॉस्पिटॅलिटी वाठारांत मनीसबळ तयार जाले ना, जाल्यार ते भायल्यान घेवचे पडटले, अशें मुख्यमंत्र्यांनी सांगलें.
प्रधानमंत्री कुशळटाय उदरगत येवजणेचो आतां 4.0 हो फुडलो पांवडो सुरू जातलो. हे येवजणे खाला कुशळटायेचेर आदारीत नवे अभ्यासक्रम सुरू जावप शक्य आसा. हाचो गोंयच्या तरणाट्यांक लाव जातलो.
कोणूच बेकार उरचो न्हय, अशें सरकाराचे यत्न आसात. पदवी उपरांत विद्यार्थ्यांनी उच्च शिक्षण घेवचे ना जाल्यार अॅप्रेंटीसशीप येवजणेचो लाव घेवन सरकारी वा खाजगी आस्थापनांत दाखल जावचे, अशें आवाहन मुख्यमंत्री डॉ. प्रमोद सावंत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
