भांगरभूंय | प्रतिनिधी
नवी दिल्ली: भारतीय पासपोर्ट हो नागरीकत्व प्रमाणपत्र न्हय, तर प्रवास दस्तावेज अशें परराश्ट्र मंत्रालयान बुधवारा स्पश्ट केलें. १४व्या पासपोर्ट सेवा दिसा निमतान आयोजीत केल्ले पत्रकार परिशदेंत सरकारान ही म्हायती दिली.
फकत आंतरराष्ट्रीय प्रवासाच्या सोयी खातीर पासपोर्ट जारी करतात अशें मंत्रालयान स्पश्ट केलां. तो फकत भारतीय नागरिकांक जारी केल्लो आसलो तरी तो स्वताक नागरीकत्व सिध्द करपी दस्तावेज मानचे ना.
ह्यान पयलीं मतदार वळेरेच्या विशेश पुनरीक्षणा कडेन संबंदीत सुनावणे मजगतीं सर्वोच्च न्यायालयानूय म्हणलां, आधार कार्ड हो वळखी खातीरचो दस्तावेज, नागरिकत्वाचो न्हय.
पासपोर्ट नागरीकत्वाची न्हय तर राश्ट्रीयत्वाची वळख
राष्ट्रीयत्व तुमी खंयच्या देणांतले आसात हें सांगता. नागरीकत्व सांगता त्या देशांत खंयचे कायदेशीर हक्क तुमकां मेळ्ळ्यात. राष्ट्रीयत्व ही तुमची वळख. नागरीकत्व तुमचे हक्क आनी जापसालदारक्यो थारायता.
१० वर्सांत केंद्रां ७ पटींनी वाडलीं, १.४७ कोटी ई-पासपोर्ट जारी जाले
फाटल्या दसकांत पासपोर्ट सेवा केंद्र आनी संबंदीत सुविधांचो आंकडो ७७ वयल्यान ५४५ जाला अशें मंत्रालयान सांगलां. २०२५ वर्सा सुरू जाल्ल्या चिप आदारीत ई-पासपोर्टांची आतां मेरेन १.४७ कोटी प्रती जारी जाल्यात.
अर्जाचेर सरासरी प्रक्रिया वेळ ५-६ दिसां मेरेन देंवला. २०१९ वर्सा १६ देशां परस आतां २७ देशांनी भारतीयांक व्हिसा मुक्त प्रवेश मेळटा.
पासपोर्ट रद्द जातकच नागरीकत्व सोंपता?
ना. पासपोर्ट रद्द केल्यार मनशाचें भारतीय नागरीकत्व सोंपता असो अर्थ जायना. पासपोर्ट जायत्या कारणांक लागून रद्द वा स्थगीत करूं येता:
चुकीची म्हायती दिवन करप
कायदेशीर प्रकरणांत कारवाय
सुरक्षिततायेचीं कारणां
पासपोर्ट कायद्यां खाला उल्लंघन
मात भारतीय नागरिकत्व रद्द करपाची प्रक्रिया वेगळी आसा आनी ती नागरिकत्व कायदो, १९५५ खाला जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
