भांगरभूंय | प्रतिनिधी
जनसारथीची मजत घेवपाचो मुख्यमंत्र्यांचो सल्लो
पणजी : जमनी आनी घरां विशीचें बरेंच झगडें वा याचिका न्यायालयांत बरींच वर्सां प्रलंबीत आसतात. जमीन वा घराच्या मोला परस चड पयशे वकिलांचेर खर्च जातात. वकिलांक पयशे दिवपा परस लोकांनी मिडीएशनच्या माध्यमांतल्यान चर्चा करून झगडें सोडचें. साळगांवकार म्हाविद्यालयाच्या जन सारथीची मजत घेवची, अशें मुख्यमंत्री डॉ. प्रमोद सावंत हांणी सांगलें.
सांखळे रवींद्र भवनांत जनकल्याण शिबीराच्या उक्तावणा उपरांत ते उलयताले.
किसान क्रेडीट, मत्स्यसंपदा अशो केंद्र सरकारच्यो ६० वेर येवजण्यो आसात. ३० लाखांचेर गोंयकारांनी हे येवजणेचो लाव घेतला, अशी म्हायती मुख्यमंत्र्यांनी दिली.
सरकारी, कोमुनिदाद तशेंच खासगी जाग्याचेर बर्याच गोंयकारांनी घरां बांदल्यांत. हीं घरां तांच्या नावार नात. आपली घरां नांवार करपा खातीर सरकारान म्हजें घर येवजण सुरू केल्या. हे येवजणे खाला आयिल्ले सगळे अर्ज डिसेंबर मेरेन सरकार निकालांत काडटलो. मुंडकार तशेंच रानां हक्क दावे लेगीत ३१ डिसेंबर मेरेन सुटावे जातले. फ्लॅट नांवार जावचे म्हूण सरकार बेगीनूच म्हजो फ्लॅट येवजण सुरू करतले.
विकसीत भारत २०४७ चें सपन साकार करतनाच २०३७ मेरेन विकसीत गोंयचे उद्दिश्ट गोंयान दावरला. हाचे खातीर सरकारान स्वयंपूर्ण गोंय मोहीम सुरू केल्या. हे मोहिमेच्या लावर्थ्यांकडेन प्रधानमंत्री नरेंद्र मोदी हांणी देड वर संवाद सादलो. गोंयकारां कडेन देड वर संवाद सादपी नरेंद्र मोदी हे पयले आनी एकमेव प्रधानमंत्री आसा, अशें डॉ. सावंत हांणी सांगलें.
केंद्र सरकारच्या येवजण्यांची म्हायती दिवपी जनकल्याण शिबिरां सगळ्या म्हालांत जातलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
