भांगरभूंय | प्रतिनिधी
गोंय पुलीस स्पोर्ट्स विभागान आयोजीत केल्ले 18वे गोंय पुलीस फुटबॉल करंड फुटबॉल सर्तीचे उक्तावणाचे मॅचींत धेंपो स्पोर्ट्स क्लब ज्युनियर्सान शिवोली-मार्नाच्या सेंट अॅंथनी स्पोर्ट्स क्लबाक 5-0 अशा गोल फरकांनी हारयलो. मॅच म्हापशेंच्या धुळेर मैदानाचेर जाली.
मॅच सुरू जायना फुडें सेंट अॅंथनीच्या पुष्पराज मांद्रेंकारान प्रतिस्पर्धी क्लबाच्या गोलपोस्टाचेर जबरदस्त हल्लो केलो. पूण, धेंपो क्लप उण्या फरकान वाटावलो. बॉल गोलपोस्टाक तेंकून गेलो. ते उपरांत धेंपोच्या आर्नोल्ड ओलिव्हेरान 12व्या मिनटाक प्रतिहल्लो केलो. ताचो लेगीत हो यत्न फुकट गेलो.
खेळ सुरू जावन अर्द वर जाता थंय आसा. पॅनल्टी बॉक्सा भायर काशीराम पोम्बुर्फेंकारान आडांगी खेळ केल्ल्या रॅफ्रीन ताका मैदाना भायर काडलो. ताका लागून सेंट अॅंथनीक 10 खेळगडे घेवन खेळचे पडले.
दुसऱ्या अर्दांत धेंपोन जबरदस्त प्रदर्शन केलें. ताणें दुसऱ्या अर्दाचे सुरवातीकूच गोल केलो. शेल्डनान हो गोल केलो. एका गोलाची आघाडी घेतल्या उपरांत धेंपोचो आत्मविस्वास वाडलो आनी ताणें मॅचीचेर आपलो पुर्ण शेक दवरलो. 55व्या मिनटाक रिचोन ओलिव्हेराच्या उत्कृश्ट पासाचेर साईरोन आल्बुकेर्कान गोल केलो.
दोन मिनटां उपरांत श्रेयश नायकान धेंपो वतीन तिसरो गोल केलो. 66व्या मिनटाक श्रेयशाच्या पासाचेर शेल्डनान गोल केलो. 83व्या मिनटाक जिमी कुलासोन क्लबाचो पांचवो गोल केलो.
ते पयलीं जाल्ल्या उक्तावण सुवाळ्याक मुखेल सोयरे म्हणून खेळां मंत्री गोविंद गावडे, आयपीएस डीजीपी जसपाल सिंग, जीएफडीसीचे चॅरमॅन ब्रह्मानंद शंखवाळकार, आयजीपी ओमवीर सिंग आनी हेर मानेस्त उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
