भांगरभूंय | प्रतिनिधी
पणजी: शेनवार, आयतार आनी दिवाळे निमतान सोमारा सुटी आशिल्ल्यान गोंयांत व्हड प्रमाणांत पर्यटक दाखल जाले. आयतारा गोंयांतल्या सगल्या पर्यटन थळांचेर पर्यटकांची गर्दी पळोवंक मेळ्ळी. पर्यटकांचे वाडटे संख्येक लागून हॉटेल तशेंच रेंट अ कार, रेंट अ बायक हांकां व्हड मागणी आशिल्ली.
गोंयांत पर्यटन हंगाम सुरू जाला आनी सगलीं पयर्टन थळां भरून गेल्यांत. विदेशी पर्यटकांचो आंकडो उणो आसलो तरी देशी पर्यटकांचो आंकडो व्हड प्रमाणांत आसा. गुजरात, दिल्ली, महाराष्ट्र, कर्नाटक ह्या राज्यांतल्यान व्हड प्रमाणांत पर्यटक गोंयांत आयल्यात.
आयतारा पावस नाशिल्ल्यान पर्यटकांक पर्यटन थळांचो बरो आस्वाद घेवंक मेळ्ळो. आयतारा जाल्ल्या नरकासूर मिरवणुकेचोय आनंद थळाव्या लोकां प्रमाण पर्यटकांनीय घेतलो.
गोंय पर्यटकांची आवडटी सुवात आशिल्ल्यान पर्यटक व्हड प्रमाणांत गोंयांत येतात. फाटलीं दोन वर्सां कोरोनाक लागून पर्यटकांची संख्या उणी आशिल्ली. ताका लागून ह्या वर्सा पुराय पावसांत लेगीत देशी पर्यटकांनी गर्दी केल्ली. नोव्हेंबरा सावन पर्यटन हंगाम सुरू जावपाचो आशिल्ल्यान ल्हवू ल्हवू विदेशी पर्यटक लेगीत गोंयांत येतले. ताका लागून आतां विदेशी पर्यटकांनी पर्यटन थळां गजबजतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
