भांगरभूंय | प्रतिनिधी
पर्वरे मनयली बलिदान दीस कार्यावळ
पणजी: भारतीय जनसंघाचे संस्थापक डॉ. श्यामाप्रसाद मुखर्जी हांच्या विचारांनी देशाच्या एकवटाक नवी प्रेरणा आनी घटाय दिल्ल्याचें पर्यटन मंत्री रोहन खंवटे हांणी सांगलें.
ते पर्वरे तांचे कचेरेंत आयोजीत केल्ल्या बलिदान दीस कार्यावळींत उलयताले.
डॉ. मुखर्जी हांची पुण्यतीथ देशभर 23 जून दिसा बलिदान दीस म्हूण मनयतात. तांचे सयत पर्वरी भाजप मंडळाचे अध्यक्ष किशोर अस्नोडकार, जिल्हो पंचायत वांगडी कविता गुपेश नायक, पेन्ह द फ्रांकाचे संरपंच स्वप्नील चोडणकार, सुकूरची सरपंच सोनिया पेडणेंकार आनी हेर पंच वांगडी तशेंच मतदारसंघांतले कार्यकर्ते व्हड संख्येन हाजीर आशिल्ले.
डॉ. मुखर्जी हे एक व्हड विचारवंत आशिल्ले. देशाच्या एकवटाक घटाय दिवपी तांची विचारधारा आशिल्ली. तांच्या ह्या विचारधारेंतल्यान नवभारताची संकल्पना मुखार आयली आनी आयज तांचेच विचारसरणीन देश विकासाचो मार्ग आपणायतना दिसता अशें खंवटे हांणी म्हणलें.
मुखर्जी हांचे सडेतोड विचार, प्रगल्भता आनी कल्पकता खुबूच अभावान दिसून येता. मुखर्जी देशाच्या एकवटाचे मूर्तीमंत आदर्श अशें व्यक्तीमत्व आशिल्लें अशें तांणी मुखार उलयतना म्हणलें.
डॉ. मुखर्जी हें एक त्यागमूर्ती आशिल्ले. वैयक्तीक हिता कडेन आडनदर करून तांणी राष्ट्रहिताक प्रधान्य दिलें. तेच खातीर तांची पुण्यतीथ बलिदान दीस म्हूण पाळटात अशें मंडळ अध्यक्ष किशोर अस्नोडकार हांणी म्हणलें.
सुरवेक मंत्री खंवटे हांचे सयत मानेस्तांनी डॉ. मुखर्जी हांच्या फोट्याक फुलां ओंपून तांकां आर्गां ओंपलीं. सरपंच चोडणकारान येवकार दिलो जाल्यार नारायण नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
