भांगरभूंय | प्रतिनिधी
पणजीः सोमारा दोनूय जिल्लो पंचायतींच्या अध्यक्षपदां खातीर वेंचणूक जातली. हे फाटभुंयेर दोनूय जिल्ल्यांच्या वांगड्यांनी अध्यक्षपद मेळोवपा खातीर ‘लॉबींग’ करपाक सुरवात केल्या. सुरवेक पक्षाचो निर्णय मान्य करपी वांगडी लेगीत आतां अध्यक्षपद मेळोवपा खातीर लॉबींग करतात अशें भाजपांतल्या सुत्रांनी सांगलें.
उत्तर गोंय जिल्लो पंचायत अध्यक्ष सिध्देश नायक आनी दक्षीण गोंय जिल्लो पंचायत अध्यक्ष सुवर्णा तेंडुलकार हांणी 2 ऑगस्टाक दिल्ले राजिनामे पंचायत संचालक सिध्दी हळर्णकार हांणी मंगळारा मान्य केल्यात. ते उपरांत सोमारा दोनूय जिल्लो पंचायतींच्या अध्यक्षपदां खातीर वेंचणूक घेवपाचो निर्णय घेतला. दोनूय जिल्लो पंचायतींनी भाजपाक स्पश्ट भोवमत आसा. देखून दोनूय सुवातेर जावपी वेंचणूक विरोधाविणें आसतली हें निश्चीत. सध्या पक्षान उत्तर गोंय जिल्लो पंचायत अध्यक्ष पदा खातीर गिरीश उस्कयकर आनी धाकू मडकयकार, आनी दक्षीण गोंय जिल्लो पंचायत अध्यक्ष पदा खातीर अनिता थोरात आनी संजना वेळीप हांचीं नांवां विचारांत घेतल्यांत. पूण, ल्हवू ल्हवू हेर वांगड्यांच्योय इत्सा वाडत आसात. वेगवेगळ्या तरांनी, मुख्यमंत्री डॉ. प्रमोद सावंत आनी राज्य अध्यक्ष सदानंद शेट तानावडे हांचे कडेन ‘लॉबींग’ करतात अशें सूत्रांनी सांगलें. मजगतीं, दोनूय जिल्लो पंचायतींचे अध्यक्ष कोण आसतले, तें सोमाराच स्पश्ट जातलें अशें तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
