चेन्नयीयनान बंगळरूक बरोबरींत आडायलो

भांगरभूंय | प्रतिनिधी

येजमान चेन्नयीयन एफसीन काल जाल्ले मॅचींत बंगळुरू एफसीक 1-1 असो बरोबरींत आडायलो. चवथ्या मिनटाक एका गोलान फाटीं पडून लेगीत चेन्नयीयनान आपलो आत्मविस्वास वगडावंक ना.

ताच्या मुखार बंगळुरूचो गोलकीपर गुरप्रीत संधू अभेद्य वणटी भशेन उबो रावलो. ना जाल्यार चेन्नयीयन ही मॅच 4 ते 5 गोल फरकांनी जिखपाचो. अखेरच्या 10 मिनटांच्या खेळांत गोलकीपर देबजीत मजुमदाराक तांबडें कार्ड दाखयिल्ल्यान ताका मैदान सोडचें पडलें तरी आसतना चेन्नयीयनान प्रतिस्पर्धी पंगडाक जबरदस्त आव्हान दिलें. 90+3 मिनटाक चेन्नयीयनाच्या क्वामे कारिकारी गोल करपाक सामको लागीं पाविल्लो. पूण, बॉल गोलपोस्टा वयल्यान गेलो. अखेरेक ही मॅच 1-1 अशी बरोबरींत सुटली.

बंगळुरू वतीन रॉय कृष्णान चवथ्या मिनटाक आनी चेन्नयीयना वतीन प्रशांत करुथादथकुनीन 45+1व्या मिनटाक गोल केलो.

मॅचीच्या चवथ्या मिनटाक गोल करून बंगळुरून चेन्नयीयनाक बॅकफुटाचेर धुकल्लो. ड्युरांड करंड सर्तींत पांच गोल करपी शिवा नारायणान बंगळुरूक ही संद मेळोवन दिली. ताणें चेन्नयीयनाच्या डिफॅण्डरांक चकयत रॉय कृष्णाक क्रॉस दिलो. कृष्णान हेडरा वरवीं गोल करून बंगळुरूक 1-0 अशी आघाडी मेळोवन दिली.

आयएसएलांत बंगळुरू वतीन खेळटना रॉय कृष्णाचो हो पयलो गोल थारलो. बंगळुरून आली बचाव फळी घटमूट दवरिल्ली. पूण, 15व्या मिनटाक ताच्या कडल्यान चूक घडली. सुदैवान प्रशांत करुथादथकुनीचो हो यत्न बंगळुरूचो गोलकीपर गुरप्रीतान आडायलो. तरी आसतना चेन्नयीयनान अखेरेक बरोबरी सादलीच. 45+1 व्या मिनटाक स्लिस्कोव्हिचच्या पासाचेर प्रशांत करुथादथकुनीन अखेरेक गुरप्रीताक चकयलोच. चेन्नयीयनान बरोबरी मेळयल्या उपरांत मॅचींत कमबॅक केलें. चेन्नयीयनान दोन ऑन टार्गेट आनी 6 ऑफ टार्गेट यत्न केले. बंगळुरू वतीन दरेकी 1 यत्न जालो.