भांगरभूंय | प्रतिनिधी
भांगरभूंय । प्रतिनिधी
पणजीः गोवा रिव्होल्युशनरी पक्षाचे आमदार विरेश बोरकार हांणी विधानसभेंत मांडल्लें पोगो विधेयकाक घटनात्मक वैधता नाशिल्ल्यान सरकाराक तें भायरावचें पडलें. विधेयकाचो मसुदो वेगळ्या पदद्तीन तयार केल्यार आम आदमी पक्षाचो ताका तेंको आसतलो अशें पक्षाचो प्रदेश अध्यक्ष अमीत पालेकार हांणी सांगलां.
विधेयक विधानसभेंत सादर केल्या उपरांत ते घटनात्मक वैधतेचे कसवटेचेर तिगपाक जाय. घटनेच्या कलम 19 प्रमाण देशाच्या दरेका नागरिकाक देशांत खंय नोकरी वा वेवसाय करपाचो मूळावो अधिकार आसा. पोगो विधेयकाचो मसुदो कश्या कसो केल्ल्यान घटनात्मक वैधतेक तें पात्र थारलें ना, तेन्ना तें पास करपाचो प्रश्नूय उप्रासना अशें पालेकार हांणी सांगलें. आमदार अॅड कार्लुस फेरेरा हांणी विधेयकाचो मसुदो तयार केल्लो, मात आपल्याक निमाणो मसुदो दाखयलो ना असें तांणी सांगल्लें हाचे कडेन पालेकारान लोकांचे लक्ष ओडलां.
गोंय आनी गोंयकारांच्या अधिकारांची राखण करपा खातीर विधेयकाचो वेगळो मसुदो केल्यार वा दुसरें विधेयक हाडल्यार आम आदमी पक्ष ताका तेकों दितलो अशें पालेकारान सांगलें. विधानसभेंत हें विधेयक मांडपाची घाई कित्याक केली. दुसऱ्या अधिवेशनांत तें मांडपाक जातालें. मात रिव्होल्य़ुशनरी गोवन्साक ते गोंयकारां खातीर कितें तरी करतात हें दाखोवपाचें आशिल्लें अशी टिका पालेकार हांणी केली.
गोंय आनी गोंयकाराची हितराखणेचें आमकांय पडला. गोंयकारांक नोकऱ्यांक 80 टक्के राखिवता दिवपाची आमची मागणी आसा. राजकीय हितसंबंद कुशीक दवोरून सगल्या आमदारांनी, पक्षांच्या अध्यक्षांनी आनी कायदो तज्ज्ञांनी एकठांय बसून गोंयकारांच्या हक्कांची राखण करपी विधेयकाचो मुसदो तयार करपाची गरज आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.