भांगरभूंय | प्रतिनिधी
जोयडा : गोंयांत ड्युटीचेर वचपा खातीर भायर सरिल्ल्या जोयडा म्हालांतल्या मालंबा – मिराशी वाड्यावेल्या तरणाट्यांचेर काळान घालो घातलो.
हे घडणुके विशीं मेळिल्ले म्हायती प्रमाण, मालंबा गांवांतल्या नागवेंद्र गावडा (२७) नांवाचो तरणाटो गवंडी काम करतालो. ताच्या धनयान गोंयांत काम आशिल्ल्याचे सांगिल्ल्यान सकाळीं साडेपांच वरांचेर तो गोंयांत वचपा भायर सरलो. घोग्यांनी पडपी पावसाक लागून अनमोड घाटावेल्या एका वोल्ताचेर ताची दुचाकी निसरून तो रस्त्यार पडलो. तेन्नाच फाटल्यान सावन येवपी एका अनवळखी वाहनान ताका चिड्डिलो. हातूंत ताची तकली आनी पांयांक गंभीर दुखापत जावन ताका जाग्यारूच मरण आयलें.
ह्या अपघाताची म्हायती रामनगर पुलिसांक मेळटाच ते रोखडेच घडणुके सुवातेर पावले. नागवेंद्राची कूड रामनगर हाडपा खातीर त्या वेळार खंयचेंच वाहन त्या वेळार नाशिल्लें. मात हावेरी हांगा दुयेंतीक पावोवन गोंयांत येवपी गोंयच्या एका खासगी ऍम्बुलन्सीच्या चालकान परिस्थिती वळखून नागवेंद्राक आपले ऍम्बुलन्सीन रामनगरच्या सरकारी भलायकी केंद्रांत दाखल केले. तपासणे वेळार दोतोरांनी नागवेंद्राक मरण आयिल्ल्याचें सांगलें. पोस्टमार्टेम केल्या उपरांत ताची कूड तांच्या कुटुंबियांचे सुवादीन केली. ह्या प्रकरणांत रामनगर पुलीस फुडलो तपास करतात.
नागवेंद्र गावडा हो कश्टी शेतकरी कुटुंबांलो मेहनती भुरगो आशिल्लो. ताका कसलेंच वेसन नाशिल्लें. धनयान ताका शुक्रारा बेगीन कामाक येवपाक सांगिल्ल्यान वेळार कामाक पावपा खातीर सकाळींच तो गोंयांत वचपाक भायर सरिल्लो, अशें गांवकारांनी सांगलें. ताच्या अपघाती मरणान मालंबा गांवाचेर दुख्खाचें सांवट पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
