भांगरभूंय | प्रतिनिधी
तोमाझीन कार्दोजः गुलाब पुरस्कार भेटवण सुवाळ्यांत उलो
भांगरभूंय I प्रतिनिधी
मडगांव: कोंकणी भास तिगोवन दवरपाक सगल्यांनी एकठांय येवपाची गरज आसा. आयज ल्हान ल्हान भासो संवसारांतल्यान काबार जायत आसात. देखून कोंकणी भास तिगोवन दवरपाक जाय अशें आदले सभापती तोमाझीन कार्दोज हांणी सांगलें. रवींद्र भवन मडगांवां फा. फ्रेडी जे दा काॅस्ता मेमोरियल ट्रस्ट, कोंकणी भाशा मंडळ आनी फेलिसीयो कार्दोजाचे पाटलावदार हांच्या जोड पालवान आयोजीत गुलाब पुरस्कार 2020-2021 भेटवण सुवाळ्यांत ते मुखेल सोयरे ह्या नात्यान उलयताले.
ह्या वेळार माचयेर जेश्ठ पत्रकार आनी साहित्यीक संदेश प्रभुदेसाय, गुलाब म्हयनाळ्याचे संपादक फाऊस्त काॅस्ता, फेलिसीयो कार्दोज पाटलावदारचे अध्यक्ष अँथनी मिनेझीस, कोंकणी भाशा मंडळाची अध्यक्ष अन्वेषा सिंगबाळ हाजीर आसली.
तामोझीन कार्दोज हांणी मुखार उलयतना सांगलें, 20 वर्सां फाटीं गुलाब म्हयनाळ्याची 30 ते 35 हजार प्रतींची विक्री जाताली. मात आयज ही विक्री उणीं जाल्या. कारण वाचपी उणें जाल्यात. वाचन उणें जालां. आयची पिळगी इंग्लीश भाशे फाटल्यान धांवता. प्रुडंट चॅनलाचे संपादक प्रमोद आचार्य हांच्या ‘हेड ऑन’ डिबेटाची तांणी तोखणाय केली. दर एकल्यान हे डिबेट पळोवपाक जाय, अशें ताणी सांगलें.
कोंकणी भास गोंयकारांच्या एकचाराची कुरु. मात, कांय जाण गोंयांत जाती धर्माच्या नांवान गोंयकारां मदीं फूट घालपाक लागल्यात. गोंयांक भाशीक एकचार आसा. आयज वाचन उणें जालां. सोशल मिडिया, ‘व्हॉट्स अॅप युनिव्हर्सिटी’चेर लोक चड विस्वास दवरपाक लागल्यात. प्रागतीक विचार फाटीं पडपाक लागल्यांत. देशाचो एकचार शेणत चल्ला, अशें संदेश प्रभुदेसाय हांणी सांगलें.
कोंकणी भाशा मंडळाची अध्यक्ष अन्वेषा सिंगबाळ हिणें मानेस्तांक येवकार दिलो. कार्यावळीचे सुत्रसंचालन ब्रिजेश शेट देसाय आनी सोनिया हांणी केले. निमाणे अँथनी मिनेझीस हांणी उपकार मानले.
गुलाब पुरस्कार 2021 फावो जाल्ले मानेस्त
फा. फ्रेडी जे दा काॅस्ता गुलाब वर्स व्यक्ती पुरस्कार 2021ः डॉ. जयंती नायक
गुलाब बरोवपी पुरस्कार 2021ः फा. इजुबियो गोम्स
गुलाब तियात्रिस्त पुरस्कार 2021ः अँथनी सॅन
फेलिसीयो कार्दोज पत्रकारिता पुरस्कार 2021ः फा. कॅरील दा सोझा
गुलाब पुरस्कार 2020 फावो जाल्ले मानेस्त
फा. फ्रेडी जे दा काॅस्ता गुलाब वर्स व्यक्ती पुरस्कार 2020ः डॉ. कार्लुस फर्नांडीस
गुलाब बरोवपी पुरस्कार 2020ः फा. मान्युएल गोम्स
गुलाब तियात्रिस्त 2020 पुरस्कारः विल्सन माझारेलो
फेलिसीयो कार्दोज पत्रकारिता पुरस्कार 2020ः प्रमोद आचार्य
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
