भांगरभूंय | प्रतिनिधी
सुदिन ढवळीकारः सौर शक्तीचेर वीज पुरवण करपाची घोशणा
भांगरभूंय । प्रतिनिधी
काणकोणः वीज खातें हे मुखार सौर शक्तीच्या आदाराचेर वीज पुरवण करतले. फुडल्या वर्सा भितर काणकोण मतदारसंघांतल्या सगळ्या वाठारांनी भूंयगत वीज जोडणी पुराय करतले. ही म्हायती वीज मंत्री सुदिन ढवळीकार हांणी दिली.
श्रीस्थळ वाठारांतल्या सरकारी विसव घरांत बसका आयोजीत केल्ली. हे बसकेंत मंत्री ढवळीकार उलयताले. ह्या वेळार सभापती रमेश तवडकार, नगराध्यक्ष रमाकांत गांवकार, सगल्या पंचायतींचे सरपंच, पंच, नगरसेवक आनी वीज खात्याचे अधिक्षक अभियंते राजीव सामंत, कार्यकारी अभियंते शशिकांत हळदीकार, ग्रीडाचे संचालक कायतान डिकॉस्टा, गृग निर्माण मंडळाचे विश्वास गावडे, सहाय्यक अभियंते संजय गांवकार आनी हेर अधिकारी हाजीर आशिल्ले.
रस्त्या वयल्या लायटीची जापसालदारकी आतां वीज खात्या कडेन आसा. थळावे पंच तशेंच नगरसेवकांनी रस्त्या वयल्या लायटीच्या खांब्या वयले जे बल्ब पेटनात तांचें सर्वेक्षण करून ताचो अहवाल वीज खात्याक दिवचो. ताकतिकेन दुसरो बल्ब घालतले, अशें मंत्री ढवळीकार हांणी सांगलें.
ग्रीड येवजणे खाला काणकोण मतदारसंघांतल्या आमोणेंच्या बलराम निवासी शाळे लागसार पायलट प्रकल्प हातांत घेतले. ह्या मतदारसंघांतल्या लोकांनी सौर शक्ती, बायो गॅस, तशेंच कुसूम पंप येवजणेचो लाव घेवचो, असो उलो मंत्री ढवळीकार हांणी मारलो.
कार्यकारी अभियंत्र्याक 5 लाख रुपया जाल्यार अधिक्षक अभियंत्याक 15 लाख रुपया मेरेन खर्च करपाची मर्यादा घातल्या. पर्यटन खात्यान ज्या ज्या वाठारांत हायमास्ट लायटी घातल्यात ताची जापसालदारकी आतां वीज खात्या कडेन आयल्या. वीज खात्यांतल्या सगल्या कर्मचाऱ्यांनी सतर्क रावून गिरायकांक सेवाक दिवची, अशें मंत्री ढवळीकार हांणी स्पश्ट केलें.
खोतीगांव पंचायत वाठारांतल्या आवळी, कुसकें, बडे, भूपर वाठारांतल्या दाण्यांचेर तशेंच केरी माथ्याचेर वीज पुरवण करची, अशी मागणी खोतीगांवचे सरपंच आनंदू देसाय हांणी केली. जाल्यार दर्यादेग वाठारांतल्या ट्रान्सफोर्मरा वयली वीज कनेक्टराची दुरुस्ती करची, पाळेळें ते राजबाग मेरेनच्या रस्त्याचेर लायटी घालच्यो, एलईडी बल्बांची दुरुस्ती करची, अशी मागणी नगराध्यक्ष रमाकांत गांवकार हांणी केली.
ह्या वेळार पैंगीणचे उपसरपंच सुनील पैंगीणकार, लोलयेंचे पंच अजय लोलयेंकार, श्रीस्थळाचे पंच राजेश वेळीप, आगोंदची उपसरपंच प्रितल फर्नांडीस हांणी विवीध समस्या मांडल्यो. काणकोण मतदारसंगांतली वीज पुरवण सुरळीत जावचे खातीर आपूण 200 कोटी रुपया खर्चाचो आराखडो तयार केला. पयल्या पांवड्याचेर पैंगीण आनी लोलयें पंचायत वाठारांतल्या भूंयगत वीज केबलाचेर 37 कोटी रुपया खर्चाक खात्यान मंजुरी दिल्ले खातीर सभापती तवडकार हांणी मंत्री ढवळीकार हांकां परबीं दिलीं.
आतां गिरायकांक स्मार्ट मिटरः मंत्री ढवळीकार
हे मुखार गिरायकांक स्मार्ट मिटर दितले. ताका लागून वीज चोरी आळाबंदा येतली. ह्या मतदारसंघांतले विजेचे पोरणे सगळे खांबे बदलतले. भूंयगत वीज केबल घातले उपरांत परतून परतून वीज पुरवण खंडीत जावपाचे प्रकार उणे जातले, अशें मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
