भांगरभूंय | प्रतिनिधी
40 प्रतिनिधींचें मतदान आशिल्लें अपेक्षीत
पणजी: अखील भारतीय काँग्रेस समितीचो राष्ट्रीय अध्यक्ष वेंचपा खातीर गोंयांतल्यान काँग्रेस प्रतिनिधींनी मतदान केलें. गोंयांत 40 गट समित्यो आशिल्ल्यान 40 प्रतिनिधींचें मतदान अपेक्षीत आशिल्लें. पूण फक्त 29 प्रतिनिधींनी मतदान केलें. उरिल्ल्या 11 प्रतिनिधींनी मतदान केलें ना.
वांगडी म्हूण दक्षीण गोंयचे खासदार फ्रान्सीस सार्दीन आनी आदले प्रदेशाध्यक्ष गिरीश चोडणकार हांणी मतदान केले उपरांत 29 प्रतिनिधींनी मतदान केलें.
काँग्रस पक्ष आपल्या नव्या राष्ट्रीय अध्यक्षाच्या फुडारपणा खाला देशांत घटमूट जातलो. काँग्रेसीचे ज्येश्ठ फुडारी मल्लिकार्जुन खरगे आनी ज्येश्ठ फुडारी शशी थरूर हे पक्षाच्या सर्वोच्च पदा खातीर वेंचणूक लडयतात अशें गोंय काँग्रेसीचे प्रदेशाध्यक्ष अमीत पाटकार हांणी सांगलें.
पणजेंतल्या पक्षाच्या मुख्यालयांत मतदान प्रक्रिया पुराय जाली. अध्यक्षपदाचे वेंचणुके खातीर कुडचडें मतदारसंघांतल्यान काँग्रेसीचो प्रतिनिधी म्हूण म्हजें मत दितना खूब खोस जाली. म्हाका खात्री आसा की नव्या राष्ट्रीय अध्यक्षांच्या फुडारपणा खाला पुराय भारतांत काँग्रेस पक्ष आनीक घटमूट जातलो अशें पाटकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
