भांगरभूंय | प्रतिनिधी
पणजेंतले रस्ते लागले नेमपाक; स्मार्ट सिटीच्या कामाचेर टिका
पणजी : हवामान खात्यान सोमारा ऑरेंज अॅलर्ट जारी केल्लो. पूण पावसान विसव घेतलो. पणजेंत जाल्यार दनपारा वत आशिल्लें. सांंजे लेगीत पावस पडलो ना. हेर वाठारांंनी सकाळच्या वेळार पावसाच्यो दडको पडल्यो.
राज्यांत फाटल्या 24 वरांंत सरासरी 44.4 मिमि पावसाची नोंद जाल्या. आतां मेरेन 357 मिमि पावस जाल्ल्यान उणाव कायम आसा. सरासरी परस 53.8 टक्के पावसाचो उणाव आसा. राज्यांत 11 जूनाक मॉन्सून पावलो. लागीं लागीं 12 दीस पावस नाशिल्लोच. शुक्रारा 23 जून सावन पावसाक सुरवात जाली. शेनवारा आनी आयतारा पावसाचो नेट आशिल्लो. हवामान खात्यान 29 जून मेरेन पावसाचो अदमास उक्तायतना सोमारा ऑरेंज अॅलर्ट जारी केल्लो. ऑरेंज अॅलर्टा प्रमाण पावस मात पडलो ना.
तीन दीस सेगीतच्या पावसाक लागून शेताच्या कामाक गती मेळ्ळ्या. धरणांतल्या उदकाचें प्रमाण वाडिल्ल्यान पियेवपाच्या उदकाचो उणाव पयस जाला.
फाटल्या 24 वरांंत फोंड्यां सगल्यांत चड 90.4 मिमि पावसाची नोंंद जाल्या. मडगांवां सगल्यांत उणो 28 मिमि पावसाची नोंद जाल्या. केपें 50 मिमि, सांंगें 34.5 मिमि, पणजी 36.4 मिमि, म्हापशें 54.2 मिमि पावसाची नोंंद जाल्या.
पणजेंतले रस्ते नेमले
पणजेंत स्मार्ट सीटी खाला सगल्या रस्त्यांंची दुरुस्ती जाल्ली. गीता बेकरी लागसगरचो रस्तो नेमलो. रस्त्याक म्हयनो जावंंक नासतना ताका वेर पडिल्ल्यान स्मार्ट सीटीच्या कामाचेर टिका जावपाक लागल्या
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
