भांगरभूंय | प्रतिनिधी
-राज्यसभा खासदार सदानंद शेट तानावडे हांकां विस्वासपणजीः संसदेच्या पावसाळी अधिवेशनांत सादर केल्लें गोंयांतल्या अनुसुचीत जमातींच्या राजकी आरक्षणाचें विधेयक नोव्हेंबरांत जावपी शिंयाळ्या अधिवेशनांत निश्चीत संमत जातलें असो विस्वास राज्यसभा खासदार आनी भाजपाचे प्रदेश अध्यक्ष सदानंद शेट तानावडे हांणी उक्तायला
पणजेच्या पक्ष कार्यालयांत जाल्ले पत्रकार परिशदेंत ते उलयताले. ह्या वेळार आमदार दाजी साळकार हाजीर आशिल्ले. आतां मेरेन राज्यांतल्या एसटी समाजाक हेर प्रकारच्या आरक्षणाचे फायदे दिवपाचें काम फकत भाजपान केलां. एसटींक राजकी आरक्षण दिवपाची प्रक्रिया सध्याच्या भाजपा सरकारानच सुरू केल्या, हाचो उल्लेख करपाक आमकां अपेस आयलें. पूण, काँग्रेस फकत हाका लागून लोकांची दिशाभूल करता. एसटी आरक्षण विधेयक 29 जुलयाक संसदेंत सादर जालां आनी तें शिंयाळ्या अधिवेशनांत निश्चीत संमत जातलें अशें तांणी सांगलें.
एक खासदार म्हूण आमी राज्यसभेंत गोंयचें प्रतिनिधित्व करतात. ते खातीर संसद अधिवेशनांत आमी गोंयच्या अनुरूप लेखी प्रस्न विचारले. आमी वट्ट 90 लेखी प्रस्न विचारिल्ले, तातूंतले 30 प्रस्न कार्यवायेंत आयले. हाचे भायर आमी शून्य वरांत लेगीत जायते प्रस्न विचारपाक पावले. एसटी राजकी आरक्षणा सयत बोगस कंपनीं स्थापन करून गोंयकारांची लुटमार, राज्यांतल्या खाजन जमनीचो प्रस्न, एर्नाकुलम रेल्वेक थिवी थांबो दिवपाचो प्रस्न अशे जायते प्रस्न संसदेंत मांडले अशें तांणी सांगलें. तशेंच राज्यांतल्या खाजन जमनीच्या संवर्धनाक केंद्र सरकारा कडल्यान 500 कोटी निधीची मागणी केल्या असोय उल्लेख तांणी केला.
……………………………..
उदरगती खातीर निधी चालूच उरतलो
बिहार आनी आंध्र प्रदेश ह्या दोन राज्यांक केंद्रीय अर्थसंकल्पाचो बरोच फायदो जालो. गोंय सरकारानय केंद्रा कडेन कांय खाशेल्यो मागणी केल्ल्यो. पूण, गोंयाक कांयच मेळ्ळें ना. हे विशीं विचारलें तेन्ना इतलीं वर्सां देशाचेर राज्य केले उपरांत फाटल्या धा वर्सांत केंद्रांतल्या मोदी सरकारान दिल्लें इतलें काँग्रेसीन गोंयाक दिल्लें ना. अर्थसंकल्पांत तजवीज नासली तरी गोंयचे उदरगती खातीर केंद्र सरकारा कडल्यान गरजेचो निधी मेळत रावतलो अशेंय तानावडे हांणी सांगलें.
…………………………..
दक्षीणेंत उमेदवार दिवपाक चुकूंक ना
लोकसभा वेंचणुकेंत दक्षीण गोंयांत हारपाचो प्रस्न परतून पत्रकारांनी मांडलो तेन्ना आमी दक्षीण गोंयांत उमेदवार दिवपाची चूक केली ना. थंय आमी प्रचार करपाक उणे पडले. देखून थंयच्या हारीची पुराय जापसालदारकी हांवेन स्विकारल्या अशें सदानंद शेट तानावडे हांणी सांगलें. 2027 वर्साचे विधानसभा वेंचणुकेंत कोणूय एकठांय आयले तरी राज्यांत भाजपा सरकार घडोवन हाडटले असोय उल्लेख तांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
