एलईडी नुस्तेमारीः कारवाये बदला तांकां मेळटा तेंको

भांगरभूंय | प्रतिनिधी

-नुस्तेकारांचो नुस्तेमारी संचालकांचेर आरोप पणजीः नुस्तेमार संचालक शर्मिला मोन्तेरो हे एलडी नुस्तेमारीचेर कारवाय करपाक अपेसी थारल्यात. संचालक एलईडी नुस्तेमारीक तेंको दिवपा खातीर बोटींत जनरेटर वापरपाची मागणी न्यायालयांत करता, तशेंच हो विशय न्यायालयांत आसा, आनी ताचेर उलोवप योग्य न्हय, अशे संचालकांनी म्हणलां.

गोंयच्या विवीध नुस्तेकार संघटणांनी नुस्तेमार संचालक शर्मिला मोन्तेरो हांची भेट घेवन गोंयांत एलडी नुस्तेमारीचेर तिची भुमिका कितें आसा आनी एलइडी नुस्तेमारीचेर कसली कारवाय केल्या असो प्रस्न तिका विचारलो.

बोटींनी सहाय्यक संचार यंत्रणे खातीर बोटींत 50 ते 150 केव्हीए जनरेटर बसोवपाची मागणी केल्या. केन्नासावन जनरेटर ह्या बोटींनी गरजेचें जावपाक लागले. 150 केव्हीए म्हळ्यार 1.50 लाख व्हॉट. तांकीचे जनरेटर 100 फ्लॅटांक उजवाड दिवपाक शकता. हे जनरेटर फक्त एलईडी नुस्तेमारी करपाक

बसोवपाचो यत्न चल्ला, असो आरोप गोंयच्या रापणकारांचो एकवोट संघटणेचे अध्यक्ष ओलेन्सियो सिमोईस हांणी केला.

जनरटेर बसोवपाची मागणी नुस्तेकारांनी केल्या व्हय, हाची जाप संचालकानी दिवपाची गरज आसा. फक्त सुरक्षेचे नदरेन 150 केव्हीए जनरेटर बसोवपाचे सांगून नुस्तेकारांक पिश्यान काडपाच्यो गजाली चल्ल्या. संचालकांनी आपल्या पदाचो राजिनामो दिवचो आणी सरकारान तिचेर सीबीआय चौकशी करची, अशी मागणी करून आठ वर्सा जाली एलईडी विशय चालूच आसा आनी बारीक नुस्तेकारांक

जाळांक कांयच लागना, हे खातीर संचालक जापसालदार आसात, असो आरोप सिमोईस हांणी केलो.

जेन्ना आमी संचालकांक तिच्यो बोटी आसा म्हण विचारले तांणे हय म्हण अशी जाप दिल्या. जर संचालका कडेन बोटी आसात जाल्यार कायद्याचे उल्लंघन म्हूण तिणें राजिनामो दिवपाक जाय. नाजाल्यार सरकारान तिका निलंबीत करपाक जाय. एलईडी नुस्तेमारीक तेंको दिवन संचालक बारीक नुस्तेकारांक काबार करपाक पळयता, असो आरोप एका नुस्तेकारान केलो. आमचे फायबराच्यो व्हडे आसात तांचो आकार वाडोवचो. तशेंच ह्या व्हड्यांक 25 हॉर्सपावर आशिल्ले मोटर बसोवपाक परवानगी दिवची ही मागणी आमी फाटली 25 वर्सा करत आसात. पूण आमच्यो मागण्यो पुराय करच्यो सोडून संचालक बोटींनी जनरेटर बसोवपा खातीर कोर्टात वेयक्तीक एफीडेव्हीट सादर करता, असोय आरोप ह्या नुस्तेकारान केलो.