भांगरभूंय | प्रतिनिधी
मुख्यमंत्री ः दवर्ले वाडदिसा निमतान खाशेली कार्यावळ
भांगरभूंय प्रतिनिधी
मडगांव: नावेली मतदारसंघाचे आमदार उल्हास तुयेंकार हे भारतीय जनता पक्षाचे सामान्य कार्यकर्ते. तांकां नावेली मतदारसंघांतल्या मतदारांनी वेंचून दिवन आपलीं उरिल्लीं कामां पूर्ण करपाची संद दिल्या. तें आपलीं कामां पूर्ण करतले. सरकार तांच्या कामांक प्राधान्य दितलें अशें उतर मुख्यमंत्री डॉ. प्रमोद सावंत हांणी दिलें.
रुमडामळ-दवर्लेच्या पटीदार भवनांत नावेली मतदारसंघाचे आमदार उल्हास तुयेंकार हांच्या वाडदिसा निमतान घडोवन हाडिल्ले खाशेले कार्यावळींत ते उलयताले.
ह्या वेळार शेतकी मंत्री रवी नायक, पर्यटन मंत्री रोहन खवंटे, उदकास्त्रोत मंत्री सुभाष शिरोडकार, समाज कल्याण मंत्री सुभाष फळदेसाय, खेळां मंत्री गोविंद गावडे, सभापती रमेश तवडकार, भाजपाचे प्रदेशाध्यक्ष सदानंद शेट तानावडे, एन आर आय आयुक्त नरेंद्र सावयकार, आमदार चंद्रकांत शेट्ये, पेमेंद्र शेट, प्रवीण आर्लेकार, जीत आरोलकार, आदले आमदार दामोदर नायक, क्लाफासियो डायस आनी हेर मानेस्त हाजीर आसले.
आमदार तुयेंकार हे भारतीय जनता पक्षाचे निश्ठावान कार्यकर्ते. पंचायत, जिल्हो पंचायत वांगडी म्हणून तांणी काम केलां. आमदार तुयेंकार हे साश्ट म्हालांतले भाजपाचे पालकमंत्री. सरकार तांच्या मार्गदर्शना खाला साश्ट म्हालाची उदरगत करतलें अशें मुख्यमंत्री डॉ. सावंत हांणी सांगलें.
आमदार तुयेंकार हांणी उलयतना पंचायत, जिल्हो पंचायतींत आसतना आपणें बरींच उदरगतीचीं कामां केल्यांत म्हणपाचें सांगलें. आमदार जाले उपरांत आपली जबाबदारी वाडल्या. नावेली मतदारसंघांतल्या लोकांक जशी उदरगत जाय तशी जातली अशेंय तांणी सांगलें.
उल्हास तुयेंकार हांच्या वाडदिसा निमतान नव्या कामांचो शुभारंभ जालो. मडगांव ते मांडप अशे कदंब बस सेवेचोय ह्या वेळार शुभारंभ जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
