भांगरभूंय | प्रतिनिधी
इंक ऑफ डिसँट : क्रिटिकल रायटिंग्स ऑन लँगवेज, लिटरेचर एँड फ्रीडम, ज्ञानपीठ सन्मानीत साहित्यीक दामोदर मावजो हांणी बरयल्ल्या लेखांचो, भाशणांचो झेलो. दामोदर मावजो हांकां गोंयकार “भाई” म्हणून वळखता. तांचे साहित्यमोगी गोंयांतूच न्हय तर गोंया भायर लेगीत उत्सूकतायेन तांच्या उतरांची वाट पळयतात. तांणी रचिल्ल्यो कादंबर्यो वा कथा झेले
आनी अणकारीत जाल्ल्या पुस्तकांचेर मोट्या प्रमाणांत चर्चा जाता पूण तातूंत
ह्या पुस्तकाचो फावो तसो उल्लेख
जायना.
इंक ऑफ डिसँट हें पुस्तक न्हय, हें एक स्वातंत्र मनाचें, धीट काळजाचें आनी अणभवांतल्यान चाळून काडिल्ल्या अप्रूप अशा विचारांचें प्रत्यक्ष स्वरूप. पुस्तकाचो माथाळो फावो तसो आसा. “डिसँट” हो एक वजनदार शब्द. हाचो कोंकणी अर्थ एकाच शब्दान सांगप कठीण. भिडेस्तपण, अज्ञानपण, स्वार्थ हे सगळे विसरून जो मनीस समाजाची भलायकी नदरेंत दवरून, खणखणीत आवाजान आपले विचार मांडटा, तोच खरो “डिसँट” करता. “डिसँट” म्हणचें भ्रश्ट वा शोशण करपा सारकी रिती, चाली, वळखून ताका झूज दिवपाची क्षमताय. भाईच्या उतरांनी ही क्षमताय भरभरून ओत्ता देखून ह्या पुस्तकाचो माथाळो सामको योग्य आसा.
हें पुस्तक 2019 वर्सा उजवाडाक आयलें आनी नामनेचे पत्रकार, लेखक आनी अनुवादक फ्रॅडरीक नोरोन्हा हांच्या “गोवा 1556” हे प्रकाशन संस्थेन पुस्तकाचें प्रकाशन केलें. पुस्तकांत वेंचून छापिल्ले लेख आनी भाशणां जुझे लॉरेन्सो हांणी संपादीत केल्यात. जुझे लॉरेन्सो हे एक इंजिनियर म्हणून वावुरतात पूण कोंकणी आनी इंग्लीश लेखक आनी अनुवादक म्हणून तांणी नामना जोडल्या.
पुस्तकाचे सुरवातेक प्रस्तावना दिल्या. प्रस्तावना बरोवपी आसा गणेश न. देवी. एक विचारवंत संशोधक आनी समाजीक चळवळकार म्हणून राष्ट्रीय मळाचेर तांची वळख आसा. देवी आपले प्रस्तावनेंत मावजो हांची स्तुती करता आनी तांणी बरयल्ले हे लेख वाचपाची गरज कित्याक आसा तें स्पश्ट करता. देवी प्रस्तावनेंत भाईचें हातांतलें पेन वा शाई अनंत आसची अशी आस्त बाळगिता.
पुस्तकाचे तीन भाग आसात. तातूंत राजकारणाक लागून लागिल्ली “फ्रिडम ऑफ स्पीच” हाचेर लागिल्ल्या बंदनाचेर विरोध आसा. आपले विचार मांडप हो लोकशायेंत मनशाचो जल्मसिद्ध हक्क. मावजो हे आपले मायभाशे खातीर खूब वावुरल्यात. कोंकणी भास ही आयज राष्ट्रीय मळार मानाच्या स्थानाचेर आसा आनी भाई आपले मायभाशेक त्या स्थानाचेर पावोवपाक धडपडल्यात. तांची कोंकणीचे प्रती आशिल्ली भावना कांय लेखांनी फुलून येता. तरणाट्यांक उर्बेभरीत करपी लेख लेगीत ह्या पुस्तकांत सांपडटात. साहित्य आनी वाचनाचें म्हत्व, आपले भोंवतणी समाजांत कितें चल्ला, बारीकसाणेन तपासपाचें म्हत्व हे सगळे ह्या पुस्तकांतल्यान जाणवता. दर एका गोंयकारान आनी खास करून तरणाट्यांनी हें पुस्तक वाचप गरजेचें. दामोदर मावजो हांच्या उतरांचें, विचारांचें आनी
स्वभावाचें म्हत्व समजून घेवप हें आयच्या काळांत गरजेचें. एक सामान्य मनीस
जावन तांचे असामान्य आनी निर्भीड विचार सदांच फुडले पिळगेक उर्बा दितले आनी तांकां सशक्त करतले हातूंत मातूय दुबाव ना.
गौरवी केणी खंवटे
7798791183
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
