भांगरभूंय | प्रतिनिधी
व्हर्च्युअल पद्दतीन प्रधानमंंत्री नरेंद्र मोदी करतले उक्तावण
पणजी : मडगांव – मुंंबय वंंदे भारत एक्स्प्रेसीचें आयज मंंगळारा 27 जूनाक प्रधानमंंत्री नरेंद्र मोदी हांंचें हस्तुकीं उक्तावण जातलें. मडगांव रेल्वे स्टेशनार आयज सकाळीं जावपी कार्यावळींत प्रधानमंंत्री हाजीर आसचे नात. ते भोपाळ सावन व्हर्च्युअल पद्दतीन उक्तावण करतले. मडगांवचे कार्यावळींत मुख्यमंंत्री डॉ. प्रमोद सावंंत, केंद्रीय मंंत्री श्रीपाद नायक, पर्यटन मंंत्री रोहन खंंवटे, खासदार फ्रान्सीस सार्दीन, महाराष्ट्राचे मंंत्री रवींंद्र चव्हाण, मडगांवचे आमदार दिगंंबर कामत आनी हेर मानेस्त हाजीर आसतले.
वंदे भारत एक्स्प्रेस रेल्वेचें पयलीं 3 जूनाक उक्तावण जावपाचें आशिल्लें. ओडिशा बालासोर हांंगा जाल्ल्या रेल्वे अपघाताक लागून उक्तावणाची कार्यावळ रद्द जाली.
प्रधानमंंत्री नरेंद्र मोदी आयज सकाळीं राणी कमलापती रेल्वे स्टेशन, भोपाळ हांंगा भेट दितले. हागां सावन पांच वंंदे भारत एक्स्प्रेस रेल्वेंचें ते उक्तावण करतले. भोपाळ – इंंदोर वंदे भारत एक्स्प्रेस, भोपाळ – जबलपूर वंंदे भारत एक्स्प्रेस, रांंची – पटणा वंंदे भारत एक्स्प्रेस, धारवाड – बंगळुरू वंदे भारत एक्स्प्रेस आनी मडगाव – मुंंबय वंंदे भारत एक्स्प्रेस ह्या गाडयांंचे उक्तावण ते करतले.
मडगांव – मुंंबय वंंदे भारत एक्स्प्रेस ही गोंंयच्या पर्यटना खातीर पुरक थारतली. मडगांव सावन मुंंबय साडे सात वरांंनी पावपाची सोय ह्या रेल्वेन जातली. पावसाच्या दिसांनी गतीचे मर्यादेक लागून हे रेल्वेक 10 वरांं लागतली. गोंंय – मुंंबय मार्गार वेपारी, पर्यटक हांंचे यो-वच सुरू आसता. ही रेल्वे जलद आशिल्ल्या कारणान प्रवाशांंच्या वेळेची बचत जातली.
भोपाळ आनी इंंदूर ही मध्य प्रदेशांतली महत्वाची शारांं आसा. पर्यटन, सांंस्कृतीक आनी धर्मीक थळांक जोडपी ही रेल्वे आसा. रांंची – पटणा रेल्वे ही झारखंंड आनी बिहाराक जोडपी पयली वंदे भारत एक्स्प्रेस रेल्वे आसा. दोन राज्यांच्या राजपाटणाक जोडपी ही रेल्वे आसा.
धारवाड – बंंगळुरू रेल्वेक लागून हुबळी शार बंंगळूरूक जोडटले. धारवाड, हुबळी, बंंगळूरू हीं कर्नाटकातलीं म्हत्वाचीं थळांं आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
