भांगरभूंय | प्रतिनिधी
सांगें बचाव समितीः सैम पेड्डेर करपाक कशेच दिवचे नात, सरकाराक शिटकावणी
भांगरभूंय । प्रतिनिधी
सांगें: सांग्यार आयआयटी खातीर केल्लें सर्वेक्षण पुराय चुकीचें आसा. शेतकारांक काळखांत दवरून, सैम मोग्यांचो विस्वासघात करून, दोंगर कापून, सैम पेड्डेर करून आमकां आयआयटी प्रकल्प नाका म्हूण आमी फाटल्या 29 दिसां सावन धरणें धरलां. विविध संस्थांनी, गोंयच्या सैम मोग्यांनी आमकां पुराय तेंको दिला. पूण सरकार, थळावो आमदार हाचेर आडनदर करता. सरकार एके वटेन सैम सांबाळात अशें सांगता जाल्यार दुसरे वटेन सैम काबार करता. हें आमी कशेंच जावपाक दिवचें नात, अशें शेनवारा सांगें बचाव समितीन आयोजीत केल्ल्या धरणे आंदोलनांत कोस्तांव मास्कारेन्हस हांणी सरकाराक शिटकावणी दिली.
सर्वेक्षण केल्ले जमनीचेर एक लेगीत झाड ना अशें म्हणलां. पूण ते जमनीचेर कितलीशींच काजूचीं आनी हेर झाडां आसात, कितलीं भाटां आसात तें परतून पळोवचें. गरजे भायर प्रकल्प हाडचे खातीर सुरय फटासो मारून लोकांक फटोवचे न्हय. सांगेंकार शाणें आसात, हुशार आसात. सरकारान कितलीय शक्त लायली तरीय आमचो विरोध हो कायम आसतलो. सैम सांबाळपा खातीर, दोंगर- झरे वाटोवपा खातीर आमी निमाण्या स्वासा मेरेन झुजतले, अशें मास्कारेन्हस हांणी सांगलें.
सांतान रॉड्रिगीस हांणी सांगलें, थळावे आमदार उदरगतीच्या नांवा खाला लोकांक नाकाशिल्लो प्रकल्प हाडपाक सोदता, ही चुकीची गजाल. तांणी फक्त आपलो फायदो पळयनासतना शेतकारांचो विचार करचो. दोंगर कापले उपरांत जावपी परिणाम पळोवचो. लोकांक उदक- वीज मेळटली काय ना, हाचो विचार करचो.
सांगें उदरगतीच्या मळार खूब फाटीं आसा. बंद पडिल्लो साखर कारखानो आमदारान परतून सुरू करचे खातीर यत्न करचे. तीन वर्सां जालीं तरीय सांगेंचो पूल जायना, तो बांदपा खातीर फुडाकार घेवचो. तरणाट्यांक रोजगार मेळटलो, अशें प्रकल्प सांग्यार हाडचे. शेतकारांक त्रासांत घालपी, सैम पेड्डेर करपी आयआयटी प्रकल्प दुसरे कडेन व्हरचो, अशे रॉड्रिगीज हांणी सांगलें. जोजस फर्नांडीस हांणी सांगलें, सांगेंच्या दरेका मनशान ह्या प्रकल्पाक विरोध करपाची गरज आसा. ते खातीर सगळ्यांनी एकठांय येवचें, असो तांणी उलो मारलो.
आमदार लोकांक पिशांत काडटाः मिल्टन फर्नांडीस
थळावो आमदार आमकां भेश्टोवपाचो यत्न करता, पूण ताचे धमकेक आमी भियेनात. दिसान दीस आमकां मेळपी तेंको वाडत आसा. सांगेंच्या लोकांचो आमकां पुराय तेंको मेळटा. कांय प्रसार माध्यमांच्या आदारान थळावो आमदार आयआयटी प्रकल्पाक पुराय तेंक आशिल्ल्याचें सांगता, पूण प्रत्यक्षांत ह्या प्रकल्पाक सांगेंकारांचो खर विरोध आसा. तो लोकांक पिशांत काडटा. आमचीं शेतां आमकां जाय, आमचें दोंगर आमकां जाय, आमचे वझरे आमकां जाय. आमच्या सैमा कडेन वायट नदरेन पळोवप्यांक आमी ओगी रावचे नात, अशें मिल्टन फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
