भांगरभूंय | प्रतिनिधी
केरी- सत्तरीः दिवाळी लागीं पावताच घरांत बोवाळ सुरू जाता. घर सजोवपा खातीर दरेकलो विवीध तरांच्यो वस्तू खरेदी करतात. तातूंत मातयेच्या वस्तूंक लेगीत खूब मागणी आसता.
घरांत मातयेची वस्तू आसप म्हणल्यार आकर्शणाची गजाल. आजो- आजये खातीर आपल्या काळांतल्यो वस्तू म्हूण ह्या वस्तूं कडेन पळोवपाचो वेगळो दृश्टीकोन आसता, जाल्यार नात- नातरांक ‘अँटीक लूक’ म्हूण त्यो घरांत सजावटी खातीर जाय आसतात. घराचें बांदकाम, सजावट हाची वाटचाल आतां पर्यावरणपूरकतेचे दिशेन जावपाक लागिल्ल्यान मातयेच्या परंपरीक वस्तूंची मागणी वाडल्या.
रांदपा खातीर वापरतालीं तीं चकचकींत आयदनां आतां कुशीक दवरून घरांतल्यो बायलो परंपरीक मातयेच्या आयदनांनी भाजी शिजोवपाक, खापराच्या तब्याचेर भाकरी भाजपाक पसंती दितात. तेचवांगडा घर सजोवपा खातीर मातयेचे शोपीस, हँगींग अशा वस्तू कडेन चड कल आसा.
मातयेचें कदें, कुणलीं, सोबेच्यो वस्तू अश्यो साबार गजाली घरांत हाडपाचेर भर दितात. भुरग्यां खातीर मेऴपी मिलेर लेगीत सध्या आकर्शक रुपांत मेळटात. मातयेच्या आयदनांनी घर सजयिल्ल्यान घराक परंपरीक ‘लूक’ मेळटाच, ते भायर घराच्या सौंदर्यांत भर पडटा.
आधुनिकतेच्या काळांत आदल्या तेंपार वापरताले ते कुमार कामांतल्यो मातयेच्या वस्तूंचो उपेग उणो जायत गेल्लो, पूण आतां दरेकल्याचो कल हो मातयेच्यो वस्तू वापरपा वटेन वाडला. आतां लोकांक सहज आनी सोंपेपणी ह्यो वस्तू मेळच्यो ह्या उद्देशान केरी सत्तरीच्या शिरोली हद्दवाडी वाठारांत लवू राघोबा पेडणेंकार हांच्या घरांत विवीध तरांच्यो मातयेच्यो वस्तू विक्रे खातीर दवरल्यात. ह्या वस्तूं मदीं मडक्यो, घुरघुरे, बाटल्यो तेचप्रमाण विवीध आकारांच्यो मातयेच्यो कुंडल्यो, विवीध आकाराच्यो आनी नक्षीदार चुली, वेगवेगळ्या तरांचे तवे आनी ताका स्टॅण्ड, मातयेच्यो तुळशी, देवाऱ्यांतली घाट, धुपारत, लग्न सुवाळ्यांतले करे, निमाण्या संस्कारा खातीर वापरतात ते बुडकुले, सुकण्यांक उदक घालपा खातीरचीं आयदनां हांचो आस्पाव आसा.
मोडचे पयशे सांबाळून दवरचे खातीर वेगवेगळ्या आकारांचे तशेंच जनावरां, सुकणीं हांच्या आकारांचे आकर्शक मिलेर, घर सजावटी खातीर मातयेच्यो सोबेच्यो वस्तू, रंगीत शोपीस, फ्लावर पॉट, मातयेचीं कपां, पेले, कायली, कडये खातीर आयदनां, पियेवपाचें उदक दवरपा खातीर वेगवेगळ्या आकाराच्यो टांकयो लेगीत थंय मेळटात.
केरी- सत्तरी सावन शिरोली वा विर्डी वा तळेखोल- दोडामार्गार वचपी मार्गाचेर ही सुवात आसा. थंयच शिरोली- विर्डी- तळेखोल तिठ्याचेर चौके कडेन रस्त्याचे कुशीक पेडणेंकार हांच्या घरांत ह्यो वस्तू विकपाक दवरल्यात. आदल्या तेंपाचेर वापरताल्यो त्यो मातयेच्यो वस्तू खऱ्यो पर्यावरणपूरक आसात. तांचो परतून प्रसार जावचो अशें आमकां दिसता. खूब जाणांक तें मानवलां. त्यो मातयेच्यो वस्तू लोकांक सहजतायेन मेळच्यो, ह्या उद्देशान ह्यो वस्तू विकपाक दवरल्यात, अशें पेडणेंकार कुटुंबान सांगलें.
दिवाळे खातीर खाशेल्यो वस्तू
दिवाळे खातीर आनी भेटवस्तू दिवचे खातीर खाशेल्यो वस्तू पेडणेंकार हांच्या घरांत विकपाक दवरल्यात. तातूंत लापयांव, हुमकळपी दिवो, उबो स्टॅण्ड आशिल्लो दिवो, जमनीचेर दवरपाचो स्टॅण्डा वयलो दिवो, गणेश दिवो प्लेट, लक्ष्मी गणेश मूर्त, विवीध जनावरांच्या फाटींचेर आशिल्ल्या पणट्यो, मोर दिलो, बावली पणटी, हँगींग प्लेट दिलो, मॅजीक लॅम्प, बेल झुंबर, घाट, नाल्ल कलश स्टॅण्ड, पणट्यो, नाल्लाची पणटी, साद्यो पणट्यो, रंगीत पणट्यो, विवीध आकाराचे आनी नक्षीचे टेराकोटा, सिरॅमिक्स पणट्यो, कवचेचो दिवो, गणेश पंचारती अश्यो साबार वस्तू उपलब्ध आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
