भांगरभूंय | प्रतिनिधी
म्हयन्याच्या पयल्या सोमारा मंत्री आयकतले कागाळी, काब्राल, मोंसेराता सावन जातली सुरवात
भांगरभूंय । प्रतिनिधी
पणजी : लोकसभा वेंचणुकेक एक वर्स आसतना आतां गोंयचे मंत्री जनता दरबार घेतले. हे विशींचो आदेश सर्वसामान्य प्रशासनान जारी केला. दर म्हयन्याच्या पयल्या सोमारा मडगांव आनी म्हापश्यां मंत्र्यांचो जनता दरबार जातलो.
केंद्र तशेंच राज्य सरकाराच्या कल्याणकारी येवजण्यांची म्हायती लोकां मेरेन पावची, म्हूण सरकाराचे यत्न सुरू आसात. कल्याणकारी येवजण्यां सयत सरकाराच्या उपक्रमांची म्हायती पावोपाचे यत्न सुरू आसात. कल्याणकारी येवजण्यांचो लाव घेतना साबार आडखळी येतात. खात्यांनी फावटी मारच्यो पडटात. लोकांच्यो कागाळी वा समस्या आयकून घेवन त्यो सुटाव्यो करपाच्या उद्देशान जनता दरबार घेवपाचो निर्णय जाला.
पयलो जनता दरबार सोमारा 3 जुलयाक जातलो. भौशीक बांधकाम खात्याचे मंत्री निलेश काब्राल म्हापश्यां लोकांचीं गाराणीं आयकतले. म्हापशें अतिरिक्त जिल्होधिकारी कार्यालयांत हो जनता दरबार जातलो. सोमारा 3 जुलयाक महसूल खात्याचे मंत्री बाबूश मोंसेरात मडगांवां जनता दरबार घेतले. मडगांवां माथानी साल्ढाणा प्रशासकी संकुलांत ही कार्यावळ जातली. खात्यांचे मुखेली आनी संबंदीत सरकारी अधिकारी हाजीर आसतले.
जनता दरबार कार्यावळीची वेवस्था तशेच समन्वयाची जापसालदारकी जिल्होधिकाऱ्यांची आसतली. कांय खात्यांविशीं लोकांच्यो खूबश्यो कागाळी आसतात. तशेंच कांय खात्यां कडेन लोकांचो सदांच संबंद येता. ह्या खात्याच्या अधिकाऱ्यांक जनता दरबाराक हाजेरी लावची पडटली, असो उल्लेख आदेशांत आसा. उदक तशेंच विजेच्या आपालिपा विशीं खूबश्यो कागाळी आसतात. हाका लागून वीज तशेच भौशीक बांधकाम खात्याच्या अधिकाऱ्यांक हाजीर रावचें पडटलें.
विधानसभा वेंचणुके पयलीं सरकारान सरकार तुमच्या दारी, ही कार्यावळ घेतिल्ली. हे कार्यावळींत मंत्री आनी अधिकारी हाजीर रावताले. आतां कागाळी आयकुपा खातीर एकूच मंत्री हाजीर रावतलो. जुलया उपरांत ऑगस्टाच्या पयल्या सोमारा दुसरे मंत्री कागाळी आयकून घेतले. सुरवात भौशीक बांधकाम खात्याचे मंत्री निलेश काब्राल आनी महसूल खात्याचे मंत्री बाबूश मोंसेरात हांचे पासून जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
