भांगरभूंय | प्रतिनिधी
काणकोण: आशियांत नामना मेळयिल्ल्या आगोंद दर्यादेगेर सद्या फातर घालून दर्याची सुंदरताय सोंपोवपाच्या कामाक सुरवात जाल्या. दर्यादेगे कुशीक आशिल्ले खाजगी जमनीत दर्याचें उदक येवचें न्हय आनी थंयच्या शॅक्साच्या सामानाक उदक लागचे न्हय म्हूण कांय जाणांनी बेकायदो राखणे वणत बांदपाक सुरवात केल्या.
सुमार 150 मिटर लांबाये मेरेन खळी मारून थंय काळे फातर घाल्यात. सीआरझॅडचें हें उल्लंघन आशिल्ल्यान काल (बुधवारा) मामलेदार कचेरेंतल्या तलाठ्यान बेकायदो कामाचो पंचनामो करून काणकोण मामलेदाराक अहवाल सादर केला.
हे संबंदी आगोंद पंचायतीची सरपंच प्रिटल फर्नांडीस हांकां विचारलें तेन्ना ह्या कामा संबंदी कोणेंच पंचायतीचो परवानो घेवपा खातीर अर्ज केल्लो ना, आनी दर्यादेगेर हें काम सुरू आशिल्ल्याची कल्पना आपल्याक नाशिल्ल्याचें तांणी सांगलें.
मजगतीं, दर्यादेगेर फातर घालपाचें हें काम रातच्या वेळार जायत आसा. हे संबंदी एक व्हिडियो व्हायरल जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
