भांगरभूंय | प्रतिनिधी
टॅक्सींक डिजिटल मिटर बसोवन लेगीत वापर जायना
भांगरभूंय I प्रतिनिधी
पणजी : बऱ्याच टॅक्सीकारांनी डिजिटल मिटर बसयल्यात, पूण तांचो वापर जायना. टॅक्सीकार डिजिटल मिटर बंद दवरतात. हाका लागून अॅपाचेर आदारीत टॅक्सी सेवा सुरू करपा खेरीत दुसरो पर्याय ना, अशें मुख्यमंत्री डॉ. प्रमोद सावंत हांणी सांगलें.
गोंयांतल्या कितल्या टॅक्सींनी डिजिटल मिटर बसयल्यात, असो प्रस्न आमदार डिलायला लोबो हांणी केलो. ह्या प्रस्नाक लागून टॅक्सींच्या डिजिटल मिटरांचेर सभाघरांत बरीच चर्चा जाली. गोंयांत 9 हजार 457 टॅक्सी आसात. हातूंतल्या 2 हजार 268 टॅक्सीकारांनी डिजिटल मिटरां खातीर अर्ज केला. सध्या एक हजार 824 टॅक्सीकारांनी टॅक्सींक डिजिटल मिटर बसयल्यात. तशेंच जांणी डिजिटल मिटर बसयल्यात तांकां 11 हजार रुपयांचें अनुदान दिलां.
पूण चडशे टॅक्सीकार डिजिटल मिटर बंद दवरतात. हाका लागून डिजिटल मिटर बसोवन लेगीत तांचो उपेग जायना, अशें मुख्यमंत्री डॉ. प्रमोद सावंत हांणी सांगलें.
डिजिटल मिटराचो जे कोण वापर करिनात, तांचेर दंडात्मक कारवाय करपाची सुचोवणी आमदार डिलायला लोबो हांणी केली.
डिजिटल मिटराक लागून भाडें चड जाता. हरशीं टॅक्सीकार भाडें उणें घेतात, पर्यटकूच टॅक्सीकारांक मिटर बंद दवरपाक सांगतात. कांय अटी तशेंच नेम थारावन अॅपाचेर आदारीत टॅक्सी सेवा सुरू करपाक हरकत ना, अशे वेंझी व्हिएगस हांणी सांगलें.
डिजिटल मिटराची कार्यवाही करप ही सरकाराची जापसालदारी आसा, अशें विजय सरदेसाय हांणी सांगलें.
गोंय सोडून हेर सगल्या व्हड शारांनी मिटराचेर आदारीत भाडें दितात. डिजिटल मिटराचेर टॅक्सी वेवसाय चल्लो जाल्यार सोयिस्कर थारतले, अशें मत आमदार कार्लोस फेरेरा हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
