भांगरभूंय | प्रतिनिधी
आशिया करंड सर्तींत अफगाणिस्तान आडचे उमळशीक वाडोवपी मॅचींत श्रीलंकेन दोन धांवड्यांनी जैत जोडलें. अफगाणिस्ताना मुखार जैता खातीर 292 धांवड्यांची मोख आशिल्ली. पूण, सुपर चारांत सुवात मेळोवपा खातीर ताका 37.1 ओव्हरींनी ती मेळोवपाची गरज आशिल्ली. पूण, ताचो डाव 37.4 ओव्हरींनी 289चेर सोंपलो.
अफगाणिस्तानाचे दोनूय ओपनर एकोडी धांवडी करून बाद जाले. पूण, मोहम्मद नबीन वन डे क्रिकेटींत अफगाणिस्ताना वतीन जलद अर्द शेंकडो नोंदयतना मुखेली हशमतुल्लाह शाहिदी सयत मॅच आपले वटेन घुंवडायली. शाहिदाक ताचे आदीं रहमत शाहान बरी साथ दिली.
अफगाणिस्तानाचो दरेक खेळगडो इतिहास घडोवपाची मोख नदरे मुखार दवरून खेळटना दिसलो. पूण, श्रीलंकेचो युवा स्पिनर दुनिथ वेलालगे हाणें एके ओव्हरींत दोन म्हत्वाच्यो विकेटी घेवन मॅच श्रीलंके वटेन घुंवडायली. पूण, अफगाणिस्तानान अखेर मेरेन हार मानूंक ना. श्रीलंकेन 37.4 ओव्हरींनी अफगाणिस्तानाचो डाव 289 धांवड्याचेर सोंपोवन सुपर चारांतली सुवात निश्चीत केली.
श्रीलंकेन सेगीत 12वे खेपे प्रतिस्पर्धी पंगडाक बाद केलो. हो एक संवसारीक विक्रम आसा. ते पयलीं हांगाच्या गद्दाफी स्टेडियमाचेर श्रीलंकेन टॉस जिखून पयलीं बॅटींग करपाचो निर्णय घेतलो आनी 50 ओव्हरींनी 8 विकेटी वगडावन 291 धांवड्यो केल्यो.
श्रीलंकेचे चार गूण जाल्यात आनी तो गटांत पयले सुवातेर आसा. बांगलादेश दोन गुणां सयत दुसरे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
